WILLEMSTAD- 15 di febrüari 2017 – Kòrsou, e isla kolorido, parti di e islanan ABC, famoso pa su playa- i kostanan chikitu i pintoresko meimei di baranka, arkitektura europeo impreshonante i beyesa natural úniko, ta esenario di e tan antisipá Sports Illustrated Swimsuit 2017. Sports Illustrated Swimsuit, ku un alkanse sin presedente di mas di 60 mion lektor rònt mundu, a bolbe na su tradishon di mustra e playanan di mas eksepshonal na mundu; e presioso awanan blou di Kòrsou ta lusi den e edishon ku ta bira disponibel awe tantu den tiendanan komo online i riba plataformanan móbil.
E isla chikitu pero yen di bida akí den zùit di Karibe Hulandes esta Kòrsou ta i ta keda un di e islanan di mas eksepshonal na mundu, ku un sinfin di opshon pa tur tipo di bishitante. E tim ku a biaha pa Kòrsou pa ehekutá e ‘photo shoot’ a eksplorá fòrti di 300 aña i e kolorido sentro di siudat Willemstad, saboriá platonan delisioso na e establesimentunan lokal i relahá na un di e mas di 35 playanan presioso di e isla, tur kaminda na Kòrsou a topa paisahenan sensashonal.
‘Swimsuit tabatin mas di 30 aña sin bishitá Kòrsou!’, segun MJ Day, Asistente di Editor Gerente pa SportsIllustrated Swimsuit. ‘Su karakterístikanan úniko, entre otro e edifisionan bunita i kolorido den sentro di Willemstad, ta distinguié di tur otro isla den Karibe. El a resultá di ta e sitio ideal pa nos fotógrafo, Ben Watts, ku gusta saka potrèt den ambiente kolorido i vibrante pues tabata un kombinashon perfekto.’
Ku bista riba e awanan blou-bèrdè di laman Karibe, e históriko i elegante Avila Beach Hotel na Kòrsou a duna bon biní na e tim i modelonan tòp di SI Swimsuit: Vita Sidorkina, Rose Bertram, Samantha Hoopes, Barbara Palvin i Myla Dalbesio pa e ‘photo shoot’ di 2017. Avila Beach Hotel su santu blanku i su playa privá amplio a brinda e sitio ideal pa e ‘shoot’ di dos siman na enkargo di e fotógrafo veterano, Ben Watts.
‘Ta konosí ku Sports Illustrated Swimsuit ta skohe e destinashonnan di mas interesante na mundu pa hasi shoot, i ta un onor ku nan a skohe nos pa e edishon akí,’ segun Eugene Rhuggenaath, Minister di Desaroyo Ekonómiko di Kòrsou. ‘Kòrsou ta un hoya skondí den sur di Karibe, i nos ta animá e lektornan di e revista pa den futuro serkano bin wak pa nan mes, e playanan sin igual, hendenan amabel, kushina variá, kultura riku i herensia kultural outéntiko di nos isla.’
