…e workshop a konta ku partisipashon di diferente partner…
WILLEMSTAD- 25 di novèmber 2016 – Komo preparashon pa e selebrashon 20 aña Willemstad riba lista di herensia mundial di UNESCO, Stichting Monumentenfonds Curaçao den koperashon estrecho ku Ofisina di Turismo di Kòrsou (CTB) a organisá riba fechanan 22 i 23 di novèmber último un workshop. Meta di workshop aki tabata pa huntu ku e partnernan mas importante studia e posibilidat pa duna mas publisidat i kontenido na nos sentro di siudat komo patrimonio mundial.
Naturalmente esaki ta na benefisio tambe di e ròl importante ku nos sentro di siudat tin komo produkto turístiko. Tambe a para ketu na e agènda di aktividatnan ku mester tuma lugá pa kana yega e fecha grandi pa selebrashon 20 aña Willemstad riba lista di herensia mundial di UNESCO kual ta 4 di desèmber 2017. Otro puntonan importante ku a keda tresé dilanti ta e diferente aspektonan ku ta di importansia pa asina revitalisá Willemstad manera entre otro mas posibilidat pa bibienda den nos sentro di siudat, desaroyo ekonómiko, aktividatnan turístiko i mantenshon di nos patrimonio mundial. Na final di e workshop di 2 dia a yega huntu na proyektonan i plannan konkreto ku e grupo lo mester bai traha riba dje. Den e próksimo simannan lo formalisá esakinan den un plan di akshon ku lo keda mandá pa tur partisipante. Na yanüari 2017 e grupo a akordá pa bolbe bini huntu pa asina diskutí progreso di e diferente akshonnan. E workshop a konta ku partisipashon di representantenan di e siguiente ministerio i organisashonnan: Stichting Monumentenfonds Curaçao, CTB, Ministerio di VVRP, MEO, DMO, SKO, CHATA, Kámara di Komersio, Plataforma / Federashon Punda i Otrobanda, arkitektonan, propietarionan, entreprenùr, desaroyadó i invershonistanan.
