WILLEMSTAD- 20 di sèptèmber 2016 – Ofisina di Turismo di Kòrsou (CTB) ta reportá un kantidat adishonal di 3.728 turista te ku luna di yüli 2016. Sifranan preliminar kolektá pa CTB ta indiká ku un total di 261.455 turista a keda registrá di yanüari pa yüli 2016 kompará ku 257.727 e mesun temporada aña pasa. E promé 7 lunanan di 2016 ta mustra un kresementu di 1% den kantidat di turista di estadia. E kresementu aki ta primordialmente komo resultado di e prestashon di region di Europa i Karibe durante e periodo di yanüari pa yüli di e aña aki. Region di Europa a sòru pa e kresementu mas grandi di 5% miéntras ku Karibe a krese ku 2%. Region di Sur Amérika a konosé un bahada di 7%. For di Nort Amérika un bahada leve di 1% a keda registrá.
CTB i MEO ta hasi uso di e modelo ‘Turistika’, pa kalkulá e kresementu ekonómiko generá for di industria di turismo. Durante e promé shete lunanan di 2016, sektor di turismo a generá un impakto direkto di 535.63 mion florin pa nos ekonomia lokal. Turistanan prosedente for di Europa a generá un total di 272.09 mion florin kual ta 51% di e totalidat. Nort Amérika, Sur Amérika i otro regionnan a generá respektivamente 120.30, 109.56 i 33.67 mion florin.
Turismo di estadia na luna di yüli 2016
Europa, e region for di kua nos ta risibí mas tantu turista ta representá un kantidat signifikante di 47% di tur bishitante pa Kòrsou. For di e region aki Kòrsou a risibí 17.367 turista kompará ku 17.183 na yüli 2015. E situashon geo-polítiko na Turkia, Egipto i Tunesia a influensha e patronchi di biahe den Europa konsiderablemente. Na kuminsamentu di e lunanan di zomer tabatin un kambio grandi kaminda biaheronan a kuminsá skohe pa bai Spaña, Portugal, Ibiza lokual a resultá den preisnan haltu pa e destinashonnan aki. Pa e motibu aki nos ta mirando kresementu pa destinashonnan den Karibe for di mayoria suidat den Europa. Hulanda, a nota un bahada leve di 1% ku un total di 13.955 turista na yüli 2016 kompará ku 14.159 na 2015. Luna di yüli na Hulanda ta e luna den kual mayoria famia ta biaha durante e vakashon di zomer pa kual motibu esaki semper ta un bon luna. E bahada leve ku nos a eksperensia ta debí na e bon wer ku tabatin na Hulanda. Alemania ta mustra un kresementu di 9%. For di Bèlgika un kresementu di 53% a keda registrá. E kresementu for di Bèlgika ta komo resultado di e situashon geo-polítiko i tambe e echo ku TUI a lansa un asina yama ‘Curaçao program’ kaminda ta inkorporá e preis di trein for di Bèlgika pa Schiphol den e preis di tíket.
Turismo di estadia for di Nort Amérika na luna di yüli a registrá un kresementu leve di 2% ku un total di 5.675 turista kompará ku 5.583 na yüli 2015. Estádos Unídos a registrá un kresementu di 7% miéntras Canada a konosé un bahada di 29% kompará ku yüli 2015. E bahada aki a keda kousa dor di un dòler kanades debil i tambe e echo ku yüli e aña aki tabatin 4 buelo kompará ku 5 na aña pasá. Aktualmente konforme e rekomendashonnan stratégiko di e Plan Maestro pa Turismo 2015 – 2020, sektor di turismo ta desaroyando plannan riba término kòrtiku i largu ku e meta pa aselerá e kresementu di turismo for di region di Nort Amérika partikularmente Estádos Unídos.
Region di Sur Amérika a konosé un bahada di 6% na yüli 2016 ku un total di 8.628 turista di estadia kompará ku 9.177 na 2015. Venezuela ta keda un merkado vulnerabel registrando un bahada di 16% miéntras Colombia a registrá 2% ménos turista na yüli 2016. Brazil a konosé un kresementu pa di 3 luna konsekutivo. E kantidat di turista di estadia registrá ta mustra un kresementu di 19%.
Karibe a registrá un bahada di 4% na yüli 2016. Un total di 3.423 turista a bishitá nos for di region Karibe e aña aki.
E kantidat di anochi ku e turista a keda riba nos pais na yüli 2016 a keda neutral. Un total di 331.392 anochi a keda registrá na yüli 2016. Region di Europa ta representá 64% di e kantidat total di anochi ku e turista a keda nos pais na yüli. For di Europa un total di 212.909 anochi a keda registrá. Region di Nort Amérika i Sur Amérika tur dos a registrá respektivamente 2% i 4% mas kantidat di anochi kompará ku yüli 2015.
Download e sifranan aki.
