WILLEMSTAD- 1 di sèptèmber 2016 – Ofisina di Turismo di Kòrsou (CTB) huntu ku Curaçao Hospitality and Tourism Association (CHATA) ta organisá un foro polítiko ku ta hiba di tema ‘Ban Papia Riba Turismo’. Turismo ta un di e pilarnan mas importante den desaroyo ekonómiko p’esei un foro dirigí riba tópikonan relashoná ku turismo. E foro ta tuma lugá dia 8 di sèptèmber próksimo di 7:30 PM pa 10:30 PM na Santa Barbara Beach & Golf Resort Curaçao. Te na e momentunan aki un total di 9 partido polítiko a konfirmá nan partisipashon na e foro.
Meta di e foro polítiko ta pa e partidonan ku ta partisipá den e elekshon benidero dia 30 di sèptèmberpresentá na esnan presente den sala kon nan ta mira desaroyo di e industria di turismo pa e próksimo 4 aña i di kua forma nan lo kier aportá i sostené e industria aki. Tur partido ku a konfirmá nan partisipashon a risibí tambe e Master Plan di Turismo kual ta duna e direkshon deliñá pa e sektor te ku aña 2020. Durante di e foro kada representante di e partidonan polítiko, lo haña 5 minüt pa primeramente presentá nan ideanan i pensamentunan relashoná ku desaroyo di turismo. Despues lo pasa pa e parti di preguntanan fórmula dor di CTB i CHATA i tambe tin oportunidat pa esnan den sala hasi pregunta na e polítikonan presente. E foro lo ta na papiamentu i lo tin tradukshon na ingles disponibel.
Pa partisipá na e foro polítiko ‘Ban Papia Riba Turismo’ por registrá grátis mandando un mail na invitation@curacao.com indikando nòmber di e personanan ku lo tei presente. Por inskribí te ku dia 6 di sèptèmber 2016.
