WILLEMSTAD- 20 di aprel 2016 – Ofisina di Turismo di Kòrsou (CTB) a inisiá e proseso di diálogo demokrátiko pa e industria di turismo pa asina yega na e strategia di merkadeo pa aña 2017. Pa ehekutá e trayekto aki ta haña asistensia di UNDP Curaçao ku ta bai guia e proseso aplikando e modelo di diálogo demokrátiko.
Pa inisiá e proseso a tene dia 20 di aprel un seshon di introdukshon ku a konta ku presentashon di primeramente sr. Martin Copeland, un spesialista riba tereno di Airlift ku eksperensia riba aspektonan manera entre otro: análisis i planifikashon di ruta, formulashon di plannan stratégiko i merkadeo. Sr. Copeland a pone énfasis riba entre otro e perspektivanan pa Kòrsou pa loke ta trata airlift, e aspirashonnan pa kresementu riba e tereno aki i e diferente faktornan ku ta di influenshá pa loke ta trata airlift. Seguidamente sra. Brenda Benjamin di Departamentu di Strategia i Planifikashon di CTB a duna informashon di e turistanan ku ta bishitá nos pais i e diferente merkadonan. A bai den detaye riba entre otro: e kantidat di turistanan ku a bishitá nos e 5 añanan tras di lomba, e tipo di akomodashon, e montante ku e turista ta gasta, kuantu ta kosta pa trese kada turista for di e diferente merkadonan kaminda ta promoviendo Kòrsou i kuantu ta e montante ku komo pais nos ta generá basá riba e loke e turista ta gasta ora e ta aki.
Sr. Raynel Martis huntu ku sr. Carl Camelia i sr. Elton Villarreal di UNDP Curaçao a duna splikashon di e konsepto di diálogo demokrátiko di UNDP. E konsepto a keda establesé despues ku un grupo di mas òf ménos 20 persona lokal a sigui un programa di training intensivo riba e metodologia diálogo demokrátiko ku a keda desaroyá dor di UNDP. E tim di diálogo demokrátiko di UNDP Curaçao ta instrumental den desaroyo di kapasidat den gobièrnu i komunidat en general pa loke ta trata e metodologia i proseso di diálogo demokrátiko. Mas aleu e tim ta responsabel tambe pa kordinashon di e proseso di diálogo demokrátiko na Kòrsou. E konsepto aki a keda usá entre otro den e diálogo ku komunidat pa loke ta trata e Plan Nashonal di Desaroyo (NDP) kual ta e resultado final mas importante di e proyekto Kòrsou Kapasitá: inkluí hende i inspirá hende!. E input generá for di e diálogonan demokrátiko aki a keda inkorporá den e vershon final di e Plan Nashonal di Desaroyo.
Riba dos fecha ku lo sigui lo tuma lugá e diskushon den grupo ku asistensia di e fasilitadonan di UNDP. E gruponan lo haña 4 diferente pregunta kual lo bai keda diskutí den kada grupo. For di e diskushonnan aki lo sali puntonan di prioridat ku a keda skohe di forma demokrátiko pa tur presente. E informashon aki CTB lo bai usa despues den formulashon di e maneho pa 2017. E mesun seshon di diálogo demokrátiko lo bai tuma lugá riba dos diferente fecha esta 21 i 25 di aprel. Interesadonan ku den nan trabou diario tin relashon direkto ku e industria di turismo por partisipá grátis na e seshon di diálogo demokrátiko. Por registrá ainda pa e seshon di dia 25 di aprel. E seshon ta tuma lugá di 5:30 pm pa 09:00 pm na Hilton Curaçao. Pa registrá bai riba curacao.com/session1
