WILLEMSTAD – 15 di mart 2016 – Djasabra último e tim enkargá ku Operashon Siman Santu bou di kordinashon di Ofisina di Turismo di Kòrsou (CTB) a tene un tour di inspekshon komo preparashon pa e temporada di Siman Santu. E tim a hasi un rekorido na e diferente arianan turístiko ku ta forma parti di e operashon pa asina chèk e estado di esakinan i palabrá kon lo bai atendé ku e sitionan aki den kuadro di Operashon Siman Santu. E tim a konsistí di representantenan di: Kuerpo Polisial Kòrsou, Politur, Janthiel Security, Hawk Eye Security, GMN, AVB, Ambulans, Brantwer, Selikor, Warda Kosta i CTB. Durante di e tour a inspekshon e parti di limpiesa i seguridat na e diferente arianan.
E sitionan ku e tim a bishitá tabata entre otro: Directeursbaai, St. Jorisbaai, Playa Kanoa, Ascencion, Jankok, Libu (Bullenbaai), Playa Forti, Playa Kalki, Shete Boka, Knip Grandi, Knip Chiki, Jeremi i Sta Cruz. A topa ku arianan basta shushi ku mester keda limpia urgente. Partikularmente e kaminda ku ta dirigí pa St. Jorisbaai i esun ku ta dirigí pa Playa Kanoa ta hopi shushi. A konstatá shushi di kas, kura i di konstrukshon bentá den e arianan aki. Esaki sigur no ta kontribuí na e dushi pais ku nos ke biba ariba.
E aspekto di seguridat tambe ta unu ku a keda analisá na e diferente sitionan ku a bishitá. Manera ta konosí tin agentenan di seguridat ubiká na algun di e arianan turístiko. Pero ta konta tambe ku koperashon di nos komunidat pa yuda tira bista riba otro i tambe nos bishitantenan. Operashon Siman Santu ta tuma lugá den e siman di 23 pa 28 di mart 2016. Durante di e siman aki lo optimalisá e aspekto di seguridat i limpiesa na diferente atrakshon turístiko i playanan.
