…Durante konferensia internashonal riba investigashon den Turismo i Hospitalidat…
WILLEMSTAD- 18 di yanüari 2016 – Resientemente a tuma lugá e “3rd World Research Summit for Tourism and Hospitality – Transforming Partners,” organisá pa Rosen College of Hospitality Management di University of Central Florida na Orlando, Merka. Ta trata aki di un konferensia internashonal dirigí riba investigashon den turismo i hospitalidat. E konferensia aki ta reuní investigadornan akadémiko/sientífiko, profeshonalnan di e industria huntu ku funshonarionan di entidatnan gubernamental i semi gubernamental, kaminda ta diskutí i debatí riba e aspektonan ku lo afektá futuro di investigashon i práktika di hospitalidat i turismo.
Durante di e konferensia Ofisina di Turismo di Kòrsou (CTB) den persona di sr. Dino Daal, di departamentu di Desaroyo Stratégiko i Planifikashon, a duna un presentashon di e resultadonan di un investigashon ku a keda hasí na Kòrsou kaminda ku a midi e impakto di turismo riba kalidat di bida di e residente na Kòrsou. Durante di e presentashon a analisá e resultadonan di e investigashon, ku básikamente ta establesé si por papia di un relashon konseptual entre impakto di turismo i satisfakshon di e habitante, ku sierto dimenshon di bida. Esun ku ta biba na Kòrsou ta kontentu ku desaroyonan di turismo? Tin adelanto den e relashon entre e residente i hospitalidat? Por supstansia un relashon den forma empíriko esta basa riba eksperensia? Esakinan ta algun di e ponensianan ku a keda tresé dilanti. E konferensia a konta ku partisipashon di mas di 300 partisipante for di diferente parti di mundu.
E tema Transforming Partners, kual tabata e tema sentral di e konferensia a sirbi komo un plataforma ekselente pa e partisipantenan di CTB riba kon por utilisá konsulta tripartit (investigadornan akadémiko, profeshonalnan den e industria i gobièrnu) pa mehorá aplikashon di investigashon i konosementu riba maneho diario na benefisio di e industria. Den diferente di e presentashonnan ekspertonan internashonal a ilustrá esaki kombiná ku algun ‘trends’ relevante pa e industria di turismo i hospitalidat.
