…E enkuentro a konta ku partisipashon di 23 empresario for di Colombia…
WILLEMSTAD- 1 di novèmber 2015 –Resientemente Ofisina di Turismo di Kòrsou (CTB) huntu ku Kámara di Komersio i Industria di Kòrsou i CINEX a organisá aki na Kòrsou un Enkuentro Empresarial pa empresarionan for di Colombia. E enkuentro a konta ku partisipashon di 23 empresario for di Bogotá, Medellín i algun na nivel nashonal ku ta kubri henter e pais. E enkuentro a kubri 3 dia di presentashon i deliberashon riba e posibilidatnan di invershon ku Kòrsou ta ofresé. Durante di e apertura a hiba palabra Minister enkargá ku Desaroyo Ekonómiko, sr. Stanley Palm, sr. Carlos Alberto Moreno, Presidente di Foro de Presidentes i sr. Willem Jonckheer, Presidente di Kámara di Komersio i Industria di Kòrsou.
Despues ku na prinsipio di luna di òktober un delegashon di Kòrsou, ku a konsistí di representantenan di CTB, Kámara di Komersio i Industria di Kòrsou i CINEX a partisipá na e di tres edishon di e ‘Encuentro de Líderes para Líderes’ organisá pa ‘Foro de Presidentes’ a sigui awor un enkuentro aki na Kòrsou. Durante di e ‘Encuentro de Líderes para Líderes’ na Colombia a ekstendé un invitashon na empresarionan kolombiano pa bishita Kòrsou pa un enkuentro empresarial.E empresarionan ku a partisipá na e enkuentro empresarial aki na Kòrsou ta di entre otro e sektor di hoteleria, konstrukshon, finansiero, komunikashon, transporte aéreo, kuminda i bebida i logístika. Ta trata aki di empresanan manera entre otro: Non Plus Ultra, Viva Colombia, Constructora Pijao, Fundación Bavaria, W Radio, Noticiero CM, CNN en Español i Bancolombia.
Kòrsou ta ofresé amplio oportunidat di invershon i komersio kual a keda presentá na e empresarionan for di Colombia. Ademas Kòrsou ta brinda oportunidat na empresarionan kolombiano pa por organisá nan eventonan, konferensiá i reunionnan akinan. Colombia ta un merkado importante pa Kòrsou i sigur awor ku no tin nesesidat di visa mas pa e kolombiano por biaha pa Kòrsou. Esaki ta hasi nos pais mas atraktivo pa e empresario kolombiano. E enkuentro a konta tambe ku presentashon di CINEX, CIFA, CAP i CPA. Tambe e empresarionan a disfrutá di un almuerso patrosiná pa CIFA i a bishita diferente sitio pa asina sera konosí ku e potensial di Kòrsou.
