…17 pais den Karibe lo partisipá…
WILLEMSTAD- 15 di òktober 2015– Dia 23 di òktober próksimo ta tuma lugá na Kòrsou un kongreso pa hóbennan di 17 pais den Karibe inkluyendo Kòrsou. E kongreso ta forma parti di e State of the Industry Conference (SOTIC) organisá pa Caribbean Tourism Organization (CTO) ku lo tuma lugá di 21 pa 23 di òktober próksimo na WTC. Kòrsou lo keda representá pa e hóben Johannah Rosaria di 17 aña di edat ku ta bishitando Dr. Albert Schweitzer Havo – VWO.
Kòrsou su representante lo kompetí ku hóbennan di entre otro Barbados, Bahamas, Cayman Islands, St. Kitts i Martinique. Johannah lo presentá un video, den kual e ta bende Kòrsou turístikamente i tambe un tópiko relashoná ku turismo. E kongreso ta un di e vehíkulonan ku CTO ta usa pa enkurashá e hóben pa konsiderá un karera den turismo. Johannah ta un hóben ku hopi potensial ku sigur lo sa di representá nos isla di un manera digno. Nos ta invitá hóbennan di Kòrsou pa bin apoyá nos representante durante e kongreso pa hóbennan. E kongreso ta tuma lugá dia 23 di òktober di 3:00 pm – 5:15 pm na WTC. Pa inskribí por tuma kontakto ku Ofisina di Turismo di Kòrsou (CTB) promé ku dia 21 di òktober próksimo. Inskripshon ta grátis djis manda bo nòmber, edat i kua skol bo ta bishitá na e email adrès info@curacao.com òf yama 434-8200 pa mas informashon. Hóben, nos ta konta ku bo apoyo.
