WILLEMSTAD 25 sèptèmber 2015:- Resientemente Ofisina di Turismo di Kòrsou (CTB) i Curaçao Extreme Foundation (CXF) a tene na Aruba un enkuentro ku prensa i amantenan di e deporte di velosidat esta ‘drag race’. Meta di e enkuentro tabata pa di forma ofisial a informá i invitá nan pa e promé edishon di Curaçao Extreme Finals 2015.
Despues di un eksitoso Curaçao International Drag Fest 2015 na luna di aprel último, e tim di Curaçao Extreme Foundation a anunsiá ku lo tin Curaçao Extreme Finals (CXF) den luna di dezèmber. E anunsio aki a haña hopi bon akohida tantu lokal komo den eksterior. CTB ta apoyá i sostené eventonan ku proyekshon internashonal i ku tin tur potensial pa atraé bishitantenan for di eksterior. CXF lo atraé e koredornan, ‘crew’ i tambe nan famia ku lo bin pa disfrutá di e kompetensianan i di tur e otro atrakshonnan ku nos dushi isla tin di ofresé. Nos hermana isla Aruba semper ta partisipá en grande durante karedanan internashonal na Kòrsou, p’esei mes e tim di CTB i CXF a tene un enkuentro ku prensa i un media-tour pa asina duna informashon di e karedanan di CXF ku lo bai tuma lugá próksimamente. Durante di e media-tour CTB a duna tambe informashon amplio di tur e otro aktividatnan ku lo tin na Kòrsou di awor aki te ku yanüari 2016.
CXF lo ta dianan 3, 4 i 5 di dezèmber próksimo. Paisnan ku ya a konfirmá nan partisipashon ta Aruba, Bonaire, Estádos Unídos, Hulanda, Puerto Rico, Repúblika Dominikana, Venezuela i naturalmente Kòrsou mes. Un danki spesial ta bai na Clarion Hotel & Suites i InselAir ku a koperá ku e enkuentro na Aruba. Pa mas informashon di CXF por bishita www.curacao-extreme.com òf e página di Facebook www.facebook.com/CuracaoExtremeFoundation.
