WILLEMSTAD- 4 sèptèmber 2015 – Tur aña di nobo KLM ta organisá su ‘KLM Beach Borrel’, un evento sosial dediká na agentenan di biahe hulandes. Meta di e evento ta pa gradisí agentenan di biahe pa tur nan esfuersonan ku nan ta hasi diariamente den ofresé KLM komo opshon di biahe pa diferente merkado. E aña aki e evento tabata tin un toke ‘krioyo’ ku presensia di Ofisina di Turismo di Kòrsou (CTB) ku a probechá e okashon pa promové Kòrsou komo destinashon turístiko pero tambe pa pone énfasis riba KLM Curaçao Marathon i Curaçao Sales Run.
Pa garantisá ku e invitadonan ta risibí un sabor di Kòrsou, CTB a sòru pa e staf ta uniformá ku T-shirt di Kòrsou. Ademas di esaki, a ofresé kòktel trahá ku likor Blue Curaçao i a repartí pastechi. E ‘KLM Beach Borrel’ a konta ku 550 agente i profeshonalnan di biahe hulandes. Durante e evento a tene algun spich den kual a hasi menshon di e KLM Curaçao Marathon ku lo tuma lugá djadumingu 29 di novèmber próksimo. Esaki lo ta e segundo edishon di e máratòn organisá pa Fundashon Run in the Sun. Partisipantenan por skohe pa kana òf kore diferente distansia, 5 òf 10 kilometer, trayekto di 10,5 òf 16,65 km i mitar òf máratòn. Tambe a elaborá riba e ‘Curaçao Sales Run’ ku ta un kampaña pa promové benta di pasashi pa Kòrsou den luna di novèmber kual ta tradishonalmente un luna slow den benta.Na final di e evento e aktor yu di Kòrsou alabes embahador di KLM Curaçao Marathon, Sr. Everon Jackson Hooi a entregá e ‘ticket di oro’ pa Kòrsou na Gabriela Smits di agensia di biahe Airtrade Holland huntu ku Sr. Toon Balm kende ta Vise Presidente di Sales & Services di KLM na Hulanda.
CTB su presensia tabata notabel durante e ‘KLM Beach Borrel’. Alabes, CTB a ekspresá gratitut pa e oportunidat di promové Kòrsou komo destinashon turístiko. Pa CTB ta un plaser di por traha den estrecho koperashon ku e kompania di aviashon KLM ku semper ta pará kla pa sirbi Kòrsou.
