WILLEMSTAD- 25 yüni 2015 – Despues di lunanan di preparashon a yega e delaster fase di e trayekto pa por yega na un Plan Maestro pa Turismo. E plan aki lo mester kubri e periodo di 2015 – 2020. Dia 29 i 30 awor lo tene un summit kaminda lo presentá e resultadonan final di e investigashonnan ku a keda hasí pa asina por yega na e Plan Maestro. E tim di Universidat di Central Florida ku a keda enkargá ku konstrukshon di e plan lo presentá e vishon, mishon i metanan stipulá pa asina Kòrsou por bira un destinashon prinsipal den Karibe dentro di e próksimo 5 añanan.
E presentashonnan lo sirbi pa splika kon Kòrsou por mehorá su posishon kompetitivo den region Karibe. E presentadónan lo diskutí kon e strategianan presentá den e plan lo por kontribuí na generá kresementu duradero di sektor di turismo di un manera sosialmente aseptabel, teniendo kuenta ku medio ambiente i ekonómikamente posibel. Pa partisipá na e summit por registrá grátis bishitando wèpsait di Ofisina di Turismo di Kòrsou na: curacao.com/mp.
