WILLEMSTAD- 23 di yüni 2015 – Ofisina di Turismo di Kòrsou (CTB) ta kontentu di por raporta un otro luna di kresementu di turismo di estadia. Sifranan preliminar kolekta pa CTB ta indiká ku pa luna di mei a registrá un oumento di 4% ku un total di 33.677 turista di estadia. Na mei 2014 e kantidat di turista tabata 32.421. E oumento di 4% ta un kantidat adishonal di 1.256 turista. 43% di e turistanan ta originá for di Europa miéntras 28% a bini for di Sur Amérika i 20% for di Nort Amérika. E kantidat prosedente for di Karibe tabata 7% den mei.
Merkado di Europa a registrá un bon prestashon di 9.5% mas turista na luna di mei. For di e region aki nos a risibí 15.080 turista di estadia kompará ku 13.772 na mei 2014. For di Hulanda, e pais for di kua nos ta risibí mas tantu turista nos a risibí 12.086 turista kual ta un oumento di 11%. Alemania a registrá un oumentu di 24%. Un total di 1.555 turista a bishita nos pais for di Alemania.
Despues di kresementu fuerte for di Venezuela durante e promé kuartal di aña, luna di mei tambe a registrá un kaida di 7% ku un total di 5.534 bishitante. Turismo di estadia for di Brazil, Colombia i Sürnam a registrá respektivamente 1%, 13% i 17% ménos turista durante luna di mei. CTB ta enfokando su esfuersonan di merkadeo pa por tin un mihó resultado for di Brazil i Colombia ku introdukshon di e buelo inougural dos biaha pa siman for di Manaus Brazil di Insel Air entrante 3 di yüli próksimo i eliminashon di visa for di Colombia entrante 1 di yüli próksimo. E pronóstiko pa e dos paisnan aki di Sur Amérika ta mustra positivo pa loke ta trata e di dos mitar di aña.
E region di Nort Amérika na luna di mei a registrá un kresementu di 27% ku un total di 6.059 turista kompará ku 4.784 na mei 2014. For di Estádos Unídos nos a risibí 5.085 turista ku ta un kresementu di 12%. Por konstatá ku 17% di e bishitantenan for di Estádos Unídos ta residensia na New York. Despues ta sigui State of Florida (16%), New Jersey (5%), California (4%) i Pennsylvania (4%). Canada a registrá un oumentu eksepshonal di 270% ku un total di 974 turista di estadia. E oumentu aki ta resultado di e buelonan di Air Canada rouge henter aña for di Toronto. CTB ta pronostiká mas kresementu for di Canada pa e aña aki. E esfuersonan di merkadeo huntu ku partnernan den industria di turismo lo sòru pa mehorashon den e prestashon di e merkado di Nort Amérika.
Turismo di estadia for di region di Karibe a konosé un oumento di 9% durante luna di mei. Un total di 3.016 turista a bishita nos kompará ku 2.776 aña pasa. For di Aruba nos a konosé un kresementu di 0% ku un total di 1.434 turista. Trinidad & Tobago i Jamaica a registrá un bon prestashon ku respektivamente kresementu di 88% i 7%.
Sifranan promé 5 lunanan di 2015
Pa loke ta trata e promé sinku lunanan di 2015 turismo di estadia a krese ku 10% di 176.911 pa 194.987. Un total di 18.076 turista adishonal a bishita nos pais registrando kresementu den e regionnan primario pa Kòrsou esta region di Nort Amérika, Sur Amérika i Europa. E regionnan a registrá kresementu di respektivamente 26%, 25% i 5%. For di region di Nort Amérika nos a registrá un total di 38.739 turista, Sur Amérika a registrá 53.925 turista i for di Europa nos a risibí un total di 84.049 turista e promé 5 lunanan di aña. For di Karibe nos a registrá un kantidat di 13.002 turista e promé 5 lunanan di aña 2015.
E kantidat di anochi ku e bishitantenan a keda nos pais e promé 5 lunanan di 2015 ta mustra un kresementu di 5%. Sifranan preliminar ta mustra un total di 1.674.830 anochi. For di e karchinan di embarkashon i desembarkashon por konstatá ku 69.0% di e kantidat total di turista di estadia a keda na un akomodashon registrá. E repartishon ta lo siguiente: hotèl di mas ku 150 kamber (31%), esnan di ménos ku 150 kamber (14%), bùngalo (16%), apartamentu (7%) i guesthouse (0.9%). E kantidat di turista ku a keda na un akomodashon no registrá ta representá 31% di e kantidat di turista ku a bishita nos durante e promé 5 lunanan di aña. Akomodashonnan no registrá ta akomodashonnan ku no ta aparesé den CTB su sistema di dato.
Hasiendo uso di e modelo ‘Turistika’, CTB huntu ku MEO a kalkulá ku durante e promé sinku lunanan di 2015, sektor di turismo a generá un impakto direkto di 343 mion florin pa nos ekonomia lokal. E promé sinku lunanan di 2014 e montante tabata 302 mion. Region di Europa a generá un total di 158 mion florin kual ta 46% di e totalidat. Su tras ta sigui region di Sur Amérika ku 85 mion, Nort Amérika ku 77 mion i e entrada generá for di region Karibe a keda kalkulá na 17 mion florin.
Download Overall Visitor Arrival Performance May 2015
Download Distribushon di akomodashon pa kada region
