WILLEMSTAD- 11 di mei 2015– Komo parti di e gira di promoshon di Kòrsou na Venezuela kual a keda anunsiá na luna di aprel último dor di Ofisina di Turismo di Kòrsou (CTB) a tuma lugá e dos último tayernan na respektivamente Maracaibo i na Barquisimeto. CTB kompañá pa partnernan den sektor di turismo a sa di presentá Kòrsou su potensial turístiko i ekonómiko na e personanan presente.
Anteriormente e tayer a keda duná na Puerto Ordaz, Caracas, Valencia i awor a toka turno na e dos último siudatnan kualnan ta Maracaibo i Barquisimeto. E tayer na Maracaibo a tuma lugá na Hotel Kristoff i esun na Barquisimeto a tuma lugá na Lidotel Hotel Boutique- Barquisimeto. E dos tayernan aki huntu a konta ku partisipashon di mas di 140 persona. Aki ta trata di representantenan di operador di tour, agente di biahe, invershonista i 16 medio di komunikashon. E tayernan a hiba komo lema ‘Kòrsou 2015 un aña di oportunidatnan empresarial’. A pone énfasis riba e potensial turístiko i ekonómiko di nos isla.
Kòrsou a destaká no únikamente serka potensial bishitantenan pa nos isla pero tambe serka esnan ku ta buska oportunidatnan nobo riba tereno di invershon. Tambe a duna informashon di e diferente kompanianan di aviashon ku ta ofresé buelo entre Venezuela i Kòrsou. CTB a keda kompaña pa vários partner den sektor turístiko manera: Curaçao Marriott Beach Resort & Emerald Casino, Hilton Curaçao, Renaissance Curaçao Resort & Casino, Santa Barbara Beach & Golf Resort, Sunscape Curaçao Resort, Spa & Casino, Piscadera Harbour Village, Papagayo Curaçao, Veneto Casino and Holiday Beach Resort i Sambil Curaçao. Tur a probechá di e okashon pa ofresé informashon balioso tokante nan servisio i produktonan. Durante di e tayernan a rifa mas di 12 premio pa kortesia di e hotèlnan i kompanianan aéreo ku ta ofresé buelo pa Kòrsou.
CTB i su partnernan ta kontentu di por a partisipá na e tayernan aki ku a brinda e oportunidat pa ekshibí Kòrsou komo e destinashon ideal pa vakashon i invershon.
