WILLEMSTAD- 3 di febrüari 2015: Pareha van de Kerkhof ta pa di 25 biaha na nan destinashon faborito esta Kòrsou. Esaki sigur ta motibu pa Ofisina di Turismo di Kòrsou (CTB) duna rekonosementu na e pareha aki. Pa e okashon spesial aki Minister di Desaroyo Ekonómiko sr. Stanley Palm a risibí e pareha i a sostené un kombersashon ku e pareha.
Pareha van de Kerkhof a konta te den detaye nan amor pa nos isla. E loke mas nan gusta ta nos hendenan ku semper a duna nan un bon servisio, nos kultura i nos playanan. Pareha van de Kerkhof gusta partikularmente Playa Lagun ku nan ta bishitá ku regularidat. Tambe nan gusta bishitá e aria di Mambo Beach. Mèrdia nan ta gusta bai kome den Plasa Bieu pa asina ta mei mei di nos hendenan lokal. Aunke ku durante aña e pareha ta bishitá otro destinashonnan nan a indiká ku nan faborito ta Kòrsou kaminda nan ta keda semper un temporada mas largu. E biaha aki e pareha a bini pa 5 siman. Minister Palm di su banda a elaborá ku e pareha riba e desaroyonan positivo ku turismo di Kòrsou ta pasando aden. Despues di e kombersashon ameno ku pareha van de Kerkhof, Minister Palm a hasi entrega di un plakat di rekonosementu i regalo na e pareha i a invitá e pareha pa sigui bishitá nos dushi pais Kòrsou.
