WILLEMSTAD-14 di òktober 2014:- Algun luna pasá un episodio di e programa di televishon ‘House Hunters International’ a keda filmá aki na Kòrsou. E pareha Urlin i Stephanie ta buskando e kas di nan soño den Karibe i Kòrsou a resultá e sitio ideal. E episodio lo pasa djarason awor 15 di òktober na HGTV. Ofisina di Turismo di Kòrsou (CTB) ta kontentu mirando ku tipo di produkshonnan manera esaki ta yuda den e esfuersonan pa merkadeá Kòrsou.
E programa ‘House Hunters International’ di HGTV ta sigui parehanan rònt mundu riba nan búskeda pa e kas di nan soño. Huntu ku e pareha ta buska un kas ku tantu paden komo pafó ta kumpli ku deseo di e pareha i ta na un preis ku nan por paga. E episodio grabá na Kòrsou ta konta di e pareha Urlin i Stephanie prosedente di Jersey ku ta disfrutando di un bida trankil na Jersey. Nan aserkamentu pragmátiko a permití nan konstruí un bon fundeshi pa futuro di nan famia. Despues di un bishita kòrtiku den Karibe Urlin a regresá Jersey bèk kompletamente namorá di e idea di tin un kas ku bista riba laman Karibe. Aunke e invershon aki lo por tin reperkushon pa e finansa di nan famia, Urlin ta determiná pa eksplorá e diferente posibilidatnan. Stephanie a disidí di apoyá Urlin den su búskeda i a disidí di kompañ’é riba su búskeda pa un kas ku bista riba laman Karibe aki na Kòrsou. Pero si resultá ku nan no por haña un kas ku ta satisfasé nan i ku nan por paga kisas Stephanie lo konvensé Urlin pa bandoná Kòrsou sin e kas di su soño.
Ku realisashon di e grabashon di e episodio di ‘House Hunters International’ por bisa ku un bes mas Kòrsou tin un logro grandi pa anotá riba su kuríkulo. E inisiativa pa e programa aki a bini di Re/Max Bon Bini Curaçao. E episodio ta klá pa bai den aire dia 15 di òktober 10:30or di anochi na HGTV. Invitashon ta bai na un i tur pa wak e episodio aki i disfrutá di otro grabashon internashonal realisá na nos dushi pais Kòrsou.
