WILLEMSTAD- 11 di ougùstùs 2014 – Dianan 10 te ku 14 di ougùstùs Kòrsou lo ta anfitrion di ‘Latin American Tour Operator Symposium 2014’ (LATOS) ku lo konta ku partisipashon di 23 mayorista den industria turístiko for di Brazil, Venezuela, Ecuador i Colombia. Ofisina di Turismo di Kòrsou (CTB), Curaçao Hospitality and Tourism Association (CHATA) i partnernan den sektor privá a uni pa realisashon di e simposio aki.
E simposio ta duna e mayoristanan partisipante oportunidat pa interkambiá di pensamentu ku CTB i e industria hotelero riba e ‘produkto’ ku Kòrsou ta ofresé. Lo deliberá riba e desaroyonan den e último 2 añanan i lo brinda e partisipantenan e oportunidat pa sera konosí mas di aserka ku Kòrsou komo destinashon turístiko. E simposio ta konta ku partisipashon di e siguiente mayoristanan: ADV, CVC, Sanchat, West Central Operadora, New Age, Nascimiento Turismo, Time Brasil Operadora, MMT Gapnet, Carcelen Travel, Corporacion Salta, Organizacion Kanguro, Golden Vacations, Mas Travel, Cielos Abiertos (WS -AVIATUR nacional), Carreño Tours, Ultraviajes Travel Services(Corporativo), CIC Mayoristas, Munditur, BCD Travel Colombia (Corporativo), Grupo L’alianxa Mayorista, UGA Turismo, Pull Travel Mayoristas i Grupo Over.
Na nan yegada e mayoristanan a disfrutá di un sena di bon bini na Sunscape Resort. Despues di e apertura ofisial e mainta a sigui ku presentashon di CTB i tambe CAP ku a elaborá riba e plannan futuro pa ku aeropuerto di Kòrsou. E orador prinsipal sra. Jeanine Pires a elaborá riba e balor ekonómiko ku turismo for di e region Latinoamerikano ta trese pa e aria di Karibe den e kaso aki spesífikamente pa Kòrsou. E dianan benidero lo enserá entre otro presentashon di sentro komersial Sambil, bishita na diferente hotèl i un seshon di opinion kaminda e partisipantenan internashonal lo kompartí nan mihó rekomendashonnan pa Kòrsou. Na final lo tin un mesa di negoshashon pa e mayoristanan, representantenan di hotèl i aeroliñanan.
Un danki ta bai na: Sunscape Curaçao Resort, Spa & Casino, Renaissance Curaçao Resort & Casino, Curaçao Marriott Beach Resort & Emerald Casino, Sambil, ACOYA Curaçao, Blue Bay Hotel Curaçao, Papagayo Beach and Lounge Resort, Kura Hulanda Village & Spa, Hilton Curaçao, Santa Barbara Beach & Golf Resort Curaçao, Funbini i Tropical Tours ku a kontribuí na realisashon di e simposio aki. LATOS ta un esfuerso pa partnernan mantené i alabes establesé relashonnan internashonal ku gruponan for di region Latinoamerikano ku tin un impakto direkto pa nos industria turístiko.
