…Buelo di Aruba Airlines lo start fin di novèmber i United Airlines na desèmber próksimo…
WILLEMSTAD – 21 di novèmber 2019– Ofisina di Turismo di Kòrsou (CTB) ta anunsiá e skema di buelo nobo pa e temporada benidero. E skema ta inkluí buelonan direkto, oumento den frekuensia i tambe regreso di diferente aerolínea pa e temporada di wenter. E skema nobo aki lo oumentá e potensial pa kresementu den kantidat di turista pa e temporada benidero i sobrá di 2020.
Minister di Desaroyo Ekonómiko, Giselle Mc William a indiká, “Mi ta sumamente kontentu ku e oumento di buelo pa e temporada benidero. Mas buelo ta nifiká mas posibilidat pa mas turista bin bishitá nos dushi pais. Sektor privá, for di hotèl, restorant i tur esnan ku ta proveé servisio den sektor di turismo tur tin un ròl importante den brinda e turista lo mihó ku nos pais tin di ofresé. Esaki ta konta tambe pa nos komo pueblo”.
Paul Pennicook, CEO di CTB a agregá, “Na CTB, nos mishon primario ta pa oumentá kresementu den kantidat di turista pa nos destinashon. E buelonan konfirmá pa e temporada benidero ta hopi prometedor i ta faborabel pa kresementu den kantidat di turista”.
Buelonan nobo pa Kòrsou
Entrante 27 di novèmber Aruba Airlines lo inisiá ku buelo direkto pa i for di Miami. E aerolínea lo introdusí 4 buelo pa siman riba djadumingu, djaluna, djárason i djabièrnè. Ademas, entrante 7 di desèmber próksimo United Airlines lo inisiá ku su buelo semanal riba djasabra for di Newark pa Kòrsou pa e temporada di wenter. Naturalmente e buelonan aki ta ideal tambe pa nos hendenan lokal ku mester biaha pa Miami i Newark pa vakashon òf pa motibu di negoshi.
Oumento frekuensia di buelo i buelonan pa temporada di wenter
Banda di e buelonan nobo, tin diferente aerolínea ku lo oumentá nan frekuensia òf inisiá bèk pa e temporada di wenter. Pa region di Europa, na fin di òktober KLM a oumentá su frekuensia di un buelo pa dia na 2 buelo pa dia riba djaluna, djaweps, djasabra i tambe djadumingu yegando na un total di 11 buelo pa siman. Condor a inisiá bèk ku su buelo semanal for di Alemania pa e temporada di wenter. Pa region di Nort Amérika, American Airlines lo bini bèk 18 di desèmber ku su di 2 buelo pa dia for di Miami i un buelo semanal for di Charlotte riba 21 di desèmber. Jetblue su di 3 buelo for di New York tambe a inisiá bèk dia 11 di novèmber último. Air Canada lo introdusí un di 4 buelo semanal for di Toronto i lo inisiá bèk ku buelo dos biaha pa siman for di Montreal. Westjet tambe a introdusí bèk su buelo semanal for di Toronto. Pa region di Sur Amérika, tin un charter di Viva Air ku ta operá kada 5 dia for di Bogotá, Colombia. Avianca ta kontinuá ku buelonan diario for di Bogotá i Wingo ta operá buelo dos biaha pa siman tambe for di Bogotá. Caribbean Airlines kual a kuminsá ku su servisio na luna di ougùstùs último, lo kontinuá ku dos buelo pa siman for di Port of Spain i awor ku Jet Air a risibí su Air Operator Certificate (AOC) esaki ta habri kaminda pa ainda mas bishitante for di Karibe.
CTB i Ministerio di Desaroyo Ekonómiko (MEO) ta gradisí, Ministerio di Tráfiko, Transporte i Planifikashon Urbano (VVRP), Curaçao Airport Partners (CAP), Curaçao Airport Holding (CAH), Curaçao Hospitality and Tourism Association (CHATA) pa nan sosten i koperashon den realisashon di e senario di airlift aki. Ku e desaroyonan nobo den sektor di akomodashon i buelonan adishonal, Kòrsou ta klá pa un komienso positivo di 2020. Laga nos kada unu ta un embahador pa nos pais i mustra nos bishitantenan for di eksterior kon úniko nos pais ta. Kòrsou ta dushi. Laga nos sòru pa nos bishitantenan sinti Kòrsou pa nan mes i asina disfrutá di nos pais.
