…10% kresementu den turismo di estadia…WILLEMSTAD – 26 di novèmber 2019 – Ofisina di Turismo di Kòrsou (CTB) ta raportá un bahada leve den kantidat di turista di estadia pa luna di òktober 2019. Un kantidat total di 34.525 turista a keda risibí kual ta 1.137 turista ménos kompará ku aña pasá. Un total di 380.966 turista di estadia a keda registrá te ku luna di òktober 2019, esaki ta 10% kresementu kompará ku aña pasá.
E region for di kual nos ta risibí mayoria turista di estadia kual ta Europa, a krese ku 5% na òktober. For di region Karibe un kresementu di 28% a keda registrá na luna di òktober. E merkado di Nort Amérika a registrá un bahada di 17%, miéntras Sur Amérika a baha ku 30% primordialmente dor ku e frontera ku Venezuela ta será miéntras aña pasá na e mesun temporada aki e tabata habrí. E kresementu registrá for di Europa i region di Karibe por keda atribuí direktamente na e siman di vakashon den luna di òktober, oumento den kantidat di buelo for di Amsterdam i tambe komienso di e servisio di dos buelo pa siman for di Port of Spain ku Caribbean Airlines. For di Hulanda, Kòrsou a risibí 15.708 bishitante ku ta konta pa un kresementu di 5%. E kantidat di turista prosedente di Trinidad & Tobago a dòbel na luna di òktober 2019.
E kantidat total di anochi pa turista a registrá un bahada di 5% na òktober 2019. Total 293 mil anochi a keda registrá. Turistanan for di Europa a keda 202 mil anochi na Kòrsou kual ta un subida di 1% den kantidat di anochi pa turista. Turistanan prosedente di Nort Amérika i di Sur Amérika a keda respektivamente un kantidat di 32 i 36 mil anochi durante luna di òktober. Turistanan prosedente di region Karibe a keda un total di 20 mil anochi na Kòrsou.
Prestashon hotèlnan – CHATA
Sifranan preliminar di òktober 2019 ta indiká ku Kòrsou a registrá un okupashon di hotèl di 66.3%. Kompará ku e mesun luna di e aña anterior (68.5%) esaki ta un bahada di 2.2 punto di porsentahe. E tarifa promedio diario (ADR) a subi ku 3.9% kompará ku 2018, di $138.96 pa $144.35 na 2019. Pa loke ta trata e entrada pa kamber disponibel (RevPAR), sifranan ta indiká un oumento chikitu di 0.6%. E entrada pa kamber disponibel na òktober 2018 tabata $95.15 i na 2019 esaki a subi na $95.69.
Turismo krusero – CPA
E sifranan di òktober 2019 ta mustra ku 21 barku krusero a keda risibí na e puerto na Willemstad kompará ku 20 barku krusero e mesun luna na aña pasá. Esaki ta un subida di 5%. Un total di 47.223 pasahero a keda risibí na òktober 2019, esaki ta 2.426 pasahero (4.9%) ménos ku e mesun luna na 2018. Motibu pa esaki ta un okupashon un tiki mas abou di e barkunan. Luna di òktober ta marka komienso di e temporada haltu di turismo krusero. Ta spera un di kuater kuartal drùk ku kresementu kontinuo kompará ku 2018.
Sifranan yanüari te ku òktober 2019
Turismo di estadia, di yanüari pa òktobera krese ku 10%. Den sifranan apsoluto ta trata di un total di 380 mil turista di estadia.
Turismo krusero, di yanüari pa òktober a krese ku 2%. Den sifranan apsoluto ta trata di un total di 588 mil turista krusero.
E kantidat total di turista ku a bishitá nos país, di yanüari pa òktober a krese ku 5%, den sifranan apsoluto ta trata di 985 mil turista.
