WILLEMSTAD- 29 di novèmber 2019 – Otro dia grandi pa Kòrsou! Aruba Airlines a inisiá ku buelo direkto for di Kòrsou pa Miami. E ruta nobo di Aruba Airlines ta habri posibilidat pa mas bishitante for di Nort Amérika bin konosé nos pais. Na mes momentu e ruta aki ta ideal pa nos pueblo lokal ku kier biaha pa Miami pa motibu di negoshi òf pa plaser. Selebrashon di e ruta nobo a tuma lugá den un ambiente ameno na Aeropuerto Internashonal Hato. Durante e resepshon a hiba palabra, Minister di Desaroyo Ekonómiko sra. Giselle Mc William, Minister di Tráfiko, Transporte i Planifikashon Urbano sra. Zita Jesus-Leito, Accountable Manager di Aruba Airlines sr. Francisco Arendsz, Director of Air Service Development and Tourism di Curaçao Airport Partners sra. Peggy Croes i CEO di Curaçao Hospitality & Tourism Association sr. Miles Mercera.
E buelonan di Aruba Airlines lo ta riba Djadumingu, Djaluna, Djárason i Djabièrnè i ta sali Kòrsou mainta 8:45 i yega Miami pa 11:45 di mainta. E buelo di regreso lo sali Miami 13:15 i lo yega Kòrsou 16:15. E buelonan lo keda efektuá ku un avion tipo Airbus-320 ku un kapasidat di 180 stul. Nos pais tin hopi pa ofresé; playanan bunita, un kultura riku, historia, arkitektura, variedat di atrakshonnan turístiko, entretenementu i mas ku tur kos nos hendenan amabel. E servisio nobo di Aruba Airlines ta hasi posibel pa mas turista bin eksperensiá e produkto úniko ku Kòrsou ta brinda.
Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP) i Curaçao Hospitality and Tourism Association (CHATA) ta felisitá Aruba Airlines ku e buelo nobo i ta deseá nan tur kos bon.
