E eksitoso dama empresario i ‘influencer’ a risibí un rekonosementu personalisá na man di Minister di Desaroyo Ekonómiko, sra. Giselle Mc William, komo rekonosementu pa su trabou promoviendo Kòrsou komo destinashon den 2019.
Willemstad – 11 di desèmber 2019 – Èks modelo internashonal, empresario, presentadó di televishon ku mas di 19.1 mion siguidó riba retnan sosial, Ana Hickmann a bira Kòrsou su embahadora di mas nobo na Brazil. Na 2018, Ana a skohe Kòrsou pa graba i produsí e promé kampaña internashonal pa shete di su produktonan, entre otro paña, sapatu, brel, hoya, tas, rushi di uña i djins. Na febrüari di 2019, el a bini Kòrsou huntu ku un tim di 11 persona i a keda 12 dia riba nos isla pa produsí e materialnan pa su kampaña.
Komo rekonosementu, Ofisina di Turismo di Kòrsou (CTB) a nombr’é “Dushi” Embahadora di Kòrsou na Brazil. Resientemente el a risibí e título akí durante un seremonia na ofisina di Ministerio di Desaroyo Ekonómiko. “Esaki ta un símbolo di rekonosementu di un selebridat ku a skohe Kòrsou pa bira parti di su empresa i ku a hunga un papel importante pa trese nos paisnan asta mas serka di otro. Nos ta spera ku Ana lo sigui promové nos Dushi Kòrsou na Brazil,” tabata e palabranan di Minister di Desaroyo Ekonómiko, sra. Giselle Mc William. E seremonia a konta ademas ku presensia di direktor di CTB, sr. Paul Pennicook i otro funshonarionan di CTB.
For di kuminsamentu, Ana a promové Kòrsou no solamente den su katalòknan, filmashonnan di moda i retnan sosial, sino tambe via nòmber di algun di su produktonan, entre otro su kolekshonnan Curaçao Blue, Tumba i Porto Maríe, ku ta hasi referensia na sierto aspekto úniko di e isla. Ademas, den e lunanan ku a pasa, tabatin imágen di kas tradishonal di Kòrsou, Handelskade, lionfish i tambe para, mata i flor riba diseño di bikini, blusa, shimis i demas artíkulo disponibel den su tiendanan i via internèt. Produkshon di e kampaña publisitario a sosodé ku pleno apoyo di CTB. “Pa mi, lo ta un gran plaser i onor di por representá e isla di Kòrsou na Brazil i sigui papia tokante tur su aspektonan bunita, manera mi a bin ta hasi for di mi promé bishita na febrüari. Brazil i Kòrsou tin hopi en komun pa loke ta nan orígen, kultura i hende amabel. P’esei, ta ku un kariño inmenso mi ta risibí e onor akí,” tabata e palabranan emoshonal di Ana Hickmann. Ana Hickmann tabata ku fakansi riba nos isla huntu ku su kasá Alexandre Correa, su yu Alexandre i su ruman muhé Fernanda.
