Komo preparashon pa temporada haltu di turismo
WILLEMSTAD – 10 di yanüari 2020 – Durante e simannan tras di lomba Ofisina di Turismo di Kòrsou (CTB) den estrecho koperashon ku Ministerio di Desaroyo Ekonómiko (MEO) i Ministerio di Salubridat, Medio Ambiente i Naturalesa (GMN) a ehekutá un plan di mantenshon na diferente playa aki na Kòrsou. Den kuadro di esaki Minister Giselle Mc William enkargá ku desaroyo ekonómiko i Minister Suzy Camelia-Römer enkargá ku salubridat, medioambiente i naturalesa huntu ku funshonarionan di CTB a hasi un bishita na algun di e sitionan ku a forma parti di e plan di mantenshon pa asina tuma nota di e trabounan ku a keda realisá.
E plan di mantenshon ta forma parti di e preparashonnan pa e temporada haltu di turismo. Tantu nos turistanan pero tambe nos pueblo lokal gusta bishitá nos playanan públiko. Pa e motibu aki ta importante pa esakinan ta den bon estado. A hasi trabounan di limpiesa, kòrta palu, pone banki di betòn, drecha trapi i krea un aria di parker. E playanan ku a forma parti di e plan di mantenshon aki ta: Daaibooi, Kenepa Grandi, Kenepa Chikí, Playa Piskadó, Playa Fòrti, Sta. Cruz, Caracasbaai, Baya Beach i Directeursbaai. Tambe a laga limpia banda di e área di rekreo na Marie Pampoen.
Tur dos Minister a ekspresá nan satisfakshon ku e trabounan ku a keda realisá. Kòrsou ta Dushi, Bib’é, Stim’é.
