WILLEMSTAD- 12 di febrüari 2020 – Resientemente Ofisina di Turismo di Kòrsou (CTB) huntu ku diferente partner den sektor privá a partisipá na e di 51 edishon di ‘International Boat Show Düsseldorf’ na Alemania. ‘BOOT 2020’ a resultá un bes mas un plataforma ideal pa sigur 400 ekshibidor promové nan produkto. E mas di 250 mil fanátiko di deporte akuátiko ku a bishitá e feria e aña aki tabata prosedente di 106 pais, di kual mas di 24% a bini for di pafó di Alemania entre otro Hulanda, Bèlgika, Gran Bretaña, Suisa, Italia, Fransia, Merka i Canada.
E feria ku ta enfoká primordialmente riba turismo di buseo i aktividatnan akuátiko un biaha mas a resultá masha eksitoso i pa su di 51 edishon a pèrkurá pa un diseño nobo ku a kubri 2 hal grandi di ekshibishon kaminda esnan presente por a risibí tur informashon pa nan próksimo vakashon. E stènt di Kòrsou durante 9 dia a ekshibí nos destinashon i bida marítimo, i a profilá nos isla komo un ‘must see’ pa tur sambuyadó ku ta buska un vakashon ekstraordinario. Tambe a duna 2 presentashon kombiná ku entrevista di 10 minüt riba e esenario prinsipal. Tur ku a bishitá e stènt di Kòrsou a haña un impreshon di nos isla via di un ‘reality goggle’, un tipo di brel ku imágen virtual. Bishitantenan a keda impreshoná! Den transkurso di e mesun siman CTB a organisá un sena na Tulip Inn na kual a invitá tur ko-ekshibidor i operadornan di tour. CTB ta gradisí partnernan di sektor privá ku e aña aki a forma parti di e tim di Kòrsou; Sun Reef Village on Sea, Rancho el Sobrino, Dive Division, Curaçao Divers i Dive Center Scuba Do.
