WILLEMSTAD – 26 di febrüari 2020 – Ofisina di Turismo di Kòrsou (CTB) ta raportá un subida di 3% den kantidat di turista di estadia pa luna di yanüari 2020. Un kantidat total di 45.691 turista a keda risibí na yanüari 2020 kompará ku 44.156 na yanüari 2019. Esaki ta un subida di 1.535 turista.
Merkado di Hulanda a inisiá aña ku un prestashon impreshonante registrando 18.863 turista kual ta un rèkòrt nobo. Europa, e region ku mas ta produsí pa Kòrsou a krese ku 1% na yanüari. E kantidat di bishitante for di Nort Amérika a registrá un kresementu di 21%. Yanüari 2020 tabata un luna ku prestashon rèkòrt for di Canada i Estádos Unídos registrando lo siguiente:
- Mas di 4000 turista di estadia for di Canada. Den sifranan apsoluto ta trata di 4.258 turista di estadia registrando 13% kresementu.
- Mas di 8000 turista di estadia for di Estádos Unídos. Den sifranan apsoluto ta trata di 8.515 turista di estadia registrando 26% kresementu.
Region di Karibe tambe a presta bon ku 23% kresementu na luna di yanüari. E region ku ta produsí mas for di Sur Amérika esta Colombia a nota un kresementu di 12% na yanüari 2020.
E kantidat total di anochi pa turista a registrá un kresementu di 5% na yanüari 2020. Total 437 mil anochi a keda registrá. Turistanan for di Europa a keda 277 mil anochi na Kòrsou kual ta un subida di 5% den kantidat di anochi pa turista. Turistanan prosedente di Nort Amérika i di Sur Amérika a keda respektivamente un kantidat di 101 i 43 mil anochi durante luna di yanüari. Turistanan prosedente di region Karibe a keda un total di 13 mil anochi na Kòrsou.
Prestashon hotèlnan – CHATA
Na yanüari 2020 Kòrsou a konosé un okupashon di hotèl di 74.7%. Esaki ta un bahada di 5.4 punto di porsentahe kompará ku 2019 (80.1%). E tarifa promedio diario (ADR) tambe a mira un bahada kompará ku 2019, di $210.75 pa $191.03 den 2020. Pa loke ta trata e entrada pa kamber disponibel, sifranan ta indiká un bahada aki tambe di 15.8%. E entrada pa kamber disponibel na 2019 tabata $168.73 i na 2020 e tabata $142.07.
Turismo krusero – CPA
E sifranan di yanüari 2020 ta mustra ku 45 barku krusero a keda risibí na e puerto na Willemstad kompará ku 51 barku krusero e mesun luna na 2019 resultando den un bahada di 11.8%. Miéntras ménos barku a drenta nos puerto na yanüari 2020 kompará ku e mesun luna na 2019, e kantidat di pasahero sí tabata mas tantu. Esaki entre otro komo resultado di yegada di barkunan ku un kapasidat mas haltu ku un averahe di pasahero di 2.740 pa barku na yanüari 2020 kompará ku 2.360 e mesun luna na 2019. Un total di 123.316 pasahero krusero a keda risibí na yanüari 2020, esaki ta 2.958 pasahero (2.5%) mas ku e mesun luna na 2019.
