WILLEMSTAD – 20 di mart 2020 – Ofisina di Turismo di Kòrsou (CTB) ta raportá un subida di 7% den kantidat di turista di estadia pa luna di febrüari 2020. Un kantidat total di 44.198 turista a keda risibí na febrüari 2020 kompará ku 41.148 na febrüari 2019. Esaki ta un subida di 3.050 turista.
Hulanda, e pais for di kua nos ta risibí mas tantu turista di estadia a registrá 3% kresementu na luna di febrüari. Total un kantidat di 17.796 turista di estadia a keda risibí for di Hulanda. Europa den su totalidat a sera luna di febrüari registrando 21.863 turista di estadia. Esaki ta un prestashon igual ku na febrüari 2019.
For di region di Nort Amérika un kantidat di 12.699 turista a bishitá nos pais. Esaki ta un kresementu di 17%. Canada a krese ku 4%. Den sifranan apsoluto ta trata di 3.921 turista di estadia. Miéntras ku for di Estádos Unídos un total di 8.778 turista a keda risibí kual ta un kresementu di 23%. For di region di Sur Amérika 5.462 turista di estadia a keda risibí. Colombia, e pais ku mas ta produsí pa Kòrsou for di region di Sur Amérika a registrá un kresementu di 66% kompará ku febrüari 2019. Den sifranan apsoluto ta trata di un total di 2.664 bishitante.
Region di Karibe tambe a presta bon ku 41% kresementu na luna di febrüari. Un total di 1.026 turista di estadia a keda risibí for di Aruba. Esaki ta un kresementu di 39%. E kresementu aki por keda direktamente atribuí komo resultado di e temporada di Karnaval.
E kantidat total di anochi pa turista a registrá un kresementu di 5% na febrüari 2020. Total 393 mil anochi a keda registrá. Turistanan for di Europa a keda 238 mil anochi na Kòrsou. Turistanan prosedente di Nort Amérika i Sur Amérika a keda respektivamente un kantidat di 95 i 39 mil anochi durante luna di febrüari. Turistanan prosedente di region Karibe a keda un total di 17 mil anochi na Kòrsou.
Turismo krusero – CPA
E sifranan di febrüari 2020 ta mustra ku e mesun kantidat di barku krusero esta 35 barku a keda risibí kompará ku febrüari 2019. E kantidat di pasahero sí tabata mas tantu. Esaki entre otro komo resultado di yegada di barkunan ku un kapasidat mas haltu ku un averahe di pasahero di 2.624 pa barku na febrüari 2020 kompará ku 2.338 e mesun luna na 2019. Un total di 91.873 pasahero krusero a keda risibí na febrüari 2020, esaki ta 10.034 pasahero (12%) mas ku e mesun luna na 2019.
