WILLEMSTAD- 13 di mei 2020 – Resientemente Ofisina di Turismo di Kòrsou (CTB) a organisá un Happy Hour virtual ku e meta pa laga personanan den e merkado Hulandes sinti Kòrsou den nan sala, kushina, kurá di kas, balkon òf na unda ku nan por tabata na momentu di e streaming. E idea tras di e Happy Hour virtual tabata pa laga e grupo ariba menshoná eksperensiá Kòrsou miéntras nan ta antisipá un futuro biahe. E di dos edishon ta tuma lugá djabièrnè awor 15 di mei 2020, e biaha aki pa laga nos siguidónan den e merkado di Nort Amérika, Sur Amérika i Karibe eksperensiá un tiki di nos dushi pais.
Debí na e desaroyonan mundial rondó di Covid-19, tur hende ta sinti e efektonan i komo destinashon nos kier laga nos siguidónan sá ku nos ta pensando riba nan. Durante e promoshon pa e Happy Hour, CTB a kompartí riba su plataforma online diferente tep i reseta di pasapalunan lokal i kòktelnan kual tradishonalmente bo ta haña na Happy Hour pa asina e siguidónan por a kuminsá prepará nan mes.
Pa e Happy Hour virtual a hinka un line-up di diferente DJ den otro for di sitionan popular di Happy Hour riba nos isla. Kada DJ a presentá un sèt di 30 minüt, hibando e siguidónan den un biahe virtual. Asina por menshoná ku por a disfrutá di un Happy Hour tur afó ku DJ Thomas di Zanzibar, DJ Alain di Mambo Beach Blvd./Cabana, DJ John di Kokomo Beach i DJ Martin di Miles Jazz Café. Di e manera aki a trese e ambiente di Kòrsou den nan kas. E Dushi Island Vibes Happy Hour a keda transmití ‘live’ for di studio di Dolfijn FM ku bistanan di Mambo Beach.
Pa insentivá pa ‘book’ un futuro biahe CTB a regalá 2 biahe pa Kòrsou; unu durante di e promoshon antisipando e evento i unu na final. Pa tur dos rifa a pidi tur persona pa transformá su área den un ‘hot spot’ tropikal ku ta fit e ambiente di Dushi Island Vibes Happy Hour. Esnan ku a hasi esaki por a gana e trip. E Dushi Island Vibes Happy Hour tabata tin un alkanse di 8,000 views i mas di 200 komentario. CTB ta gradisí partnernan Dolfijn FM, Jan Thiel Beach, Mambo Beach Blvd, Kokomo Beach i Miles Jazz Café. Pa eksperensiá e di dos edishon di Dushi Island Vibes Happy Hour sigui nos djabièrnè awor 15 di mei di 5PM – 7PM riba curacao.com
