WILLEMSTAD- 14 di yüni 2020 – Komo preparashon pa reapertura responsabel di nos frontera, Ofisina di Turismo di Kòrsou (CTB) den kolaborashon estrecho ku Ministerio di Salubridat Públiko, Medio Ambiente i Naturalesa (GMN), Ministerio di Desaroyo Ekonómiko (MEO), Curaçao Civil Aviation Authority (CCAA) i sektor privá ta trahando riba introdukshon di un seri di protokòl pa industria di hospitalidat. Ku e protokòlnan aki, e industria ta kla pa pone den práktika e reglanan di higiena, alsa proseduranan sanitario i práktika distansia físiko manera deskribí pa e outoridatnan responsabel pa salu públiko. Na mes momentu e informashon aki lo sirbi tambe pa nos partnernan den eksterior ku ta bende Kòrsou turístikamente. E seri di protokòl lo karga e seyo ‘A Dushi Stay, the Healthy Way’. Ku ‘A Dushi Stay, the Healthy Way’, CTB kier komuniká ku Kòrsou ta práktikamente COVID-free i ta un destinashon ku ta brinda e turista un estadia seif, saludabel i plasentero miéntras ta sigurá pa tantu e bishitante komo trahadónan den e industria ta mantené nan mes na e protokòlnan konforme e normal nobo.
Salú di tantu nos bishitantenan, trahadónan den industria i nos pueblo lokal ta keda importante na momentu di apertura di nos frontera. E seri di protokòl pa industria di hospitalidat lo inkluí entre otro e aspekto di komunikashon ku empleadonan i tambe ku e turista tantu promé ku su yegada, durante di su estadia, na momentu di su regreso i despues di su regreso, training pa empleadonan, reglanan pa prevení plamamentu di virùs, mantenshon di distansia físiko, proseduranan sanitario, reglanan di higiena, i e proseduranan ku mester tin na lugá pa den kaso ku un persona ta mustra síntomanan di COVID-19.
Pa sigurá ku e industria ta bon informá di e kontenido di e protokòlnan CTB den estrecho kolaborashon ku GMN i sektor privá lo ofresé seshon di informashon pa e industria di hospitalidat. Lo ofresé e seshonnan aki pa sektor di akomodashon, restorant, atrakshon, transporte públiko i sektor akuátiko. Curaçao Hospitality & Tourism Association (CHATA) lo sòru pa komuniká e protokòl ‘A Dushi Stay, the Healthy Way’ na su miembronan.
Tambe CTB a produsí spesialmente pa agentenan di biahe den eksterior i tambe e futuro bishitante un karchi digital yamando Bon Biní na nos bishitantenan i tambe un video ku ta mustra di un manera fásil kon nos destinashon a prepará pa risibí turistanan bèk.
Kòrsou meskos ku hopi pais rònt mundu tambe a keda afektá pa COVID-19. E desaroyonan relashoná ku e pandemia aki a trese un paro total den nos industria di turismo. Ku apertura responsabel i gradualmente di nos frontera, Kòrsou lo por kuminsá risibí turista bèk. CTB lo sigui monitoriá tur desaroyo i ta keda den konsulta ku tur e outoridatnan relevante i kompetente pa asina por komuniká tur informashon relevante den nos merkadonan di enfoke. Nos situashon normal a kambia pero huntu nos ta inisiá e kaminda pa e normal nobo.
