…Sifranan preliminar òktober 2020…
WILLEMSTAD- 5 di novèmber 2020 – Ofisina di Turismo di Kòrsou (CTB) ta raportá un kantidat di 13.556 turista di estadia pa luna di òktober. Ta e promé biaha desde ku gradualmente a kita e restrikshonnan pa ku entrada na Kòrsou, ku por mira un kresementu supstansial den kantidat di turista di estadia. Kòrsou a risibí 8.195, 9.227 i 10.418 turista di estadia na luna di yüli, ougùstùs i sèptèmber respektivamente. Na òktober a oumentá e kantidat máksimo di pasahero ku ta permití pa drenta Kòrsou pa luna di 10.000 pa 20.000. Esaki a sòru pa e kresementu sólido di 13.556 turista di estadia. 94% di e kantidat di turista registrá ta prosedente di Europa.
94% di e europeonan ku a bishitá Kòrsou ta prosedente di Hulanda. Nos a risibí 11.979 turista for di Hulanda kual ta 24% ménos kompará ku òktober 2019. For di Alemania un kantidat di 358 turista aleman a keda registrá, un bahada di 81% kompará ku aña pasá. Na luna di òktober, 60% di turistanan for di Europa a keda den un ‘resort hotel’ (esta hotèl chikí, grandi i bùngalo), miéntras 40% a keda den un akomodashon alternativo. E kresementu fuerte di turista di estadia for di Europa na luna di òktober a nifiká tambe un oumento den estadia na ‘resort hotels’. E kresementu fuerte for di Europa ta resultado direkto di e esfuersonan di promoshon kontinuo na Europa dor di CTB i partnernan den industria i tambe e oumento den e kantidat stipulá di pasahero ku por bishitá Kòrsou entrante luna di òktober último. Un otro indikadó interesante ta e kantidat averahe di anochi ku e turista europeo a keda nos pais. Na òktober 2020 e averahe di anochi tabata 10.8, miéntras aña pasá e mesun luna a registrá un averahe di 8.9 anochi. Esaki ta 21% kresementu den e kantidat averahe di anochi ku turistanan for di Europa a keda riba nos pais.
