…Turismo di Estadia na luna di novèmber…
WILLEMSTAD- 11 di desèmber 2020 – Ofisina di Turismo di Kòrsou (CTB) ta raportá un kantidat di 13.705 turista di estadia pa luna di novèmber. Ta mirando un kresementu stabil tur luna den kantidat di turista di estadia desde ku gradualmente a kuminsá trese kambio den e restrikshonnan pa ku entrada na Kòrsou entrante promé di yüli último. Kòrsou a risibí 8.195, 9.227, 10.420 i 13.556 turista di estadia na luna di yüli, ougùstùs, sèptèmber i òktober respektivamente i awor 13.705 na novèmber. 91% di e kantidat di turista registrá ta prosedente di Europa i kasi tur e europeonan aki esta 95% a bini for di Hulanda.
Kòrsou a risibí 11.915 turista for di Hulanda kual ta 71% di novèmber 2019 (16.803 turista hulandes). For di Alemania un kantidat di 231 turista aleman a keda registrá. Na luna di novèmber, 55% di turistanan for di Europa a keda den un ‘resort hotel’ (esta hotèl chikí, grandi i bùngalo), miéntras 45% a keda den un akomodashon alternativo. Un otro trend ku nos ta notando ta e kantidat averahe di anochi ku e turista europeo a keda nos pais. Turistanan prosedente for di Europa a keda 2 anochi adishonal na novèmber 2020 kompará ku novèmber 2019. Na novèmber 2020 e averahe di anochi tabata 11.4, miéntras aña pasá e mesun luna a registrá un averahe di 9.3 anochi.
For di region Karibe, Kòrsou a risibí 556 turista di estadia na novèmber, primordialmente for di e islanan den Reino Hulandes. Nos a risibí 375 for di Aruba, 102 for di Bonaire i 46 turista di estadia for di St. Maarten. Desde reinisio di e servisio di un biaha pa siman di United Airlines for di Newark, Kòrsou a risibí 201 bishitante. Esaki ta desde ku gradualmente ta tresiendo kambio den e restrikshon di biahe for di Estádos Unídos.
CEO di CTB, Paul Pennicook a remarká, “e desaroyo resien kaminda Kòrsou a risibí kódigo oraño serka Hulanda, lo bai redusí lamentablemente e kantidat di turista di estadia ku nos ta risibí mensualmente for di Hulanda”. CTB, MEO, CHATA i demas stakeholders ta den kombersashon ku Tim di Krísis pa deliberá riba formanan kon e impakto negativo di kódigo oraño lo por keda redusí”, asina e CEO a kontinuá bisando.
