WILLEMSTAD- 15 di sèptèmber 2021 – Ofisina di Turismo di Kòrsou (CTB) ta raportá un kantidat di 30.852 turista di estadia pa luna di ougùstùs. Ku e kantidat di turista di estadia aki, luna di ougùstùs 2021 a logra 79% di e kantidat registrá na ougùstùs 2019 esta promé ku pandemia. Na ougùstùs 2019 un total di 38.933 turista di estadia a bishitá Kòrsou. Ougùstùs 2019 tabata un luna hopi fuerte pa loke ta trata kantidat di turista, mirando ku e tempu ei nos a risibí un kantidat di turista adishonal kual a bini nos pais den kuadro di e Curaçao North Sea Jazz Festival. Kòrsou a risibí 20.107 turista for di Hulanda na ougùstùs 2021. Ku e sifra aki por indiká ku ougùstùs ta e di dos luna konsekutivo ku Kòrsou a risibí riba 20 mil turista di estadia for di Hulanda den un luna so.
Na ougùstùs, un kantidat di 22.770 turista di estadia a bishitá Kòrsou for di Europa. For di Hulanda nos a risibí 20.107 turista, 1.056 for di Alemania i 482 for di Bèlgika. Di e turistanan europeonan, 60% a keda den un ‘resort hotel’ (esta hotèl grandi, chikí i bùngalo) na luna di ougùstùs. For di Estádos Unídos un kantidat di 4.349 turista a bishitá Kòrsou na luna di ougùstùs. Di e turistanan merikano, 70% a keda den un ‘resort hotel’. For di region di Sur Amérika un total di 1.657 turista di estadia a bishitá Kòrsou, 40% tabata prosedente di Colombia miéntras 20% tabata prosedente di Brazil. For di Karibe un total di 1.305 turista di estadia a keda risibí na ougùstùs. Mayoria di e turistanan aki ta prosedente di e paisnan den Reino Hulandes.
Na luna di ougùstùs un total di 11 barku krusero a bishitá nos pais ku un total di 11.850 turista krusero.
“Ku riba 30 mil turista di estadia na luna di ougùstùs por bisa ku rekuperashon den kantidat di turista a kue forsa. E desaroyo aki tabata posibel dor di e bon kolaborashon ku stakeholders lokal i tambe ku nos partnernan internashonal den nos merkadonan prinsipal. Si wak e kantidat di turista risibí durante e aña aki por bisa ku esaki ta kasi igual na e kantidat risibí na 2020 den e mesun temporada. Si e tendensia aki kontinuá nos lo tin kresementu kompará ku aña 2020 dentro di algun dia”, asina CEO di CTB, Paul Pennicook a remarká.
