WILLEMSTAD- 16 di desèmber 2021 – Den un ambiente ameno na Aeropuerto Internashonal Hato a tuma lugá selebrashon di e buelo inougural di SARPA su ruta, Medellín – Kòrsou. SAPRA ta un aerolínea ku mas di 40 aña di eksperensia ehekutando buelonan charter i brindando e servisio di air ambulance. SARPA tin un historia kaba ku Kòrsou mirando ku e aerolínea tin hopi aña ta ehekutá e servisio di air ambulance entre Kòrsou i Colombia. Entrante 16 di desèmber, SARPA a start su buelo komersial ku frekuensia di 2 biaha pa siman saliendo for di Medellín pa Kòrsou riba djaweps i djadumingu. E ruta Medellín – Kòrsou ta e aerolínea su promé ruta komersial internashonal. E buelonan lo keda efektuá ku un Embraer ku un kapasidat di 50 stul. Durante e resepshon a hiba palabra, Minister di Desaroyo Ekonómiko, Ruisandro Cijntje, President & CEO di SARPA, Carlos Mesa i Director of Air Service Marketing & Development na Curaçao Airport Partners, Peggy Croes.
Minister Ruisandro Cijntje tambe tabata riba e aerolínea su promé buelo pa Kòrsou. E konekshon ku SARPA ta brinda e posibilidat pa mas turista prosedente di Colombia bin eksperensiá tur loke Kòrsou tin di ofresé; diferente tipo di akomodashon, playanan bunita, nos historia riku, deportenan akuátiko, nos kushina krioyo, platonan internashonal i mas ku tur kos nos hendenan amabel.
Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP) i Curaçao Airport Holding (CAH) ta felisitá SARPA ku e buelo nobo i ta deseá nan tur kos bon.
