WILLEMSTAD- 20 di desèmber 2021 – Resientemente a tuma lugá firmamentu di e akuerdo pa konstrukshon di e terser fase di e área di rekreashon na Marie Pampoen. E akuerdo a keda firmá pa sr. Hugo Clarinda, direktor athunto di Ofisina di Turismo di Kòrsou (CTB) i sr. Wendell Bonafacio, direktor di Curacaose Wegenbouw Maatschappij B.V. (CWM). E firmamentu di e akuerdo a tuma lugá den presensia di Minister di Desaroyo Ekonómiko, sr. Ruisandro Cijntje.
Den e último añanan por a tuma nota ku a konstruí diferente fasilidat na e área di rekreo na Marie Pampoen. E fasilidatnan aki ta sumamente bon usá pa diferente grupo den nos komunidat i tambe bishitantenan. E desaroyo na e área ta forma parti di un plan maestro pa desaroyá un área di rekreo ku aktividatnan ekonómiko pa e habitantenan di Kòrsou en general i di Marie Pampoen i bisindario en partikular. Na mes momentu e área lo fungi komo un produkto turístiko kaminda e turista por topa ku e hende lokal i eksperensiá nos isla. Den e terser fase di e proyekto lo enfoká riba diferente fasilidat pa rekreo i deporte manera entre otro un playa riba tera ku diferente palapa, diferente posibilidat pa mucha i hóbennan por hunga i dibertí, un área pa fitness den airu liber, un pir, posibilidat pa hasi beach volleyball, 3 kiosko, diferente banki, áreanan pa piknik, edifisio pa tualèt, landscaping, iluminashon, protekshon di kosta i tambe e infrastruktura nesesario pa awa i koriente.
Kordinashon di e proyekto, kual ta finansiá for di fondonan ku a keda fasilitá pa Ministerio pa Desaroyo Ekonómiko, ta den man di CTB. E supervishon di e konstrukshon ta na enkargo di Heren2 Caribbean. E planifikashon ta pa kuminsá ku konstrukshon na komienso di aña 2022.
