WILLEMSTAD- 21 di desèmber 2021 – Jetair Caribbean a selebrá inisio di otro ruta mas, kual ta e konekshon entre Kòrsou i Medellín. E selebrashon a tuma lugá na Aeropuerto Internashonal Hato kaminda dignatarionan huntu ku invitadonan spesial tabata presente. E buelo inougural aki ta marka inisio di e di sinku destinashon di e aerolínea. Di e manera aki e aerolínea ta sigui amplia su skema di buelo inkluyendo awor buelonan direkto pa i for di Colombia. Durante e resepshon a hiba palabra, Minister di Desaroyo Ekonómiko, Ruisandro Cijntje, Minister di Tráfiko, Transporte i Planifikashon Urbano, Charles Cooper, Managing Director di Jetair Caribbean Antonio Ribeiro, CEO di Jetair Caribbean Robert Maas i Director of Air Service Marketing & Development na Curaçao Airport Partners, Peggy Croes.
E ruta nobo di Jetair ta hasi posibel pa mas turista for di Colombia bin eksperensiá e produkto úniko ku Kòrsou ta brinda. Diferente tipo di akomodashon, playanan bunita, historia, arkitektura, deportenan akuátiko, variedat di atrakshonnan turístiko, nos kushina krioyo, platonan internashonal i mas ku tur kos nos hendenan amabel. Ademas, e konekshon nobo ku Jetair ta brinda tambe mas opshon di biahe pa nos pueblo lokal. E buelo di Jetair lo ta riba djamars i djabièrnè. E buelonan ta keda efektuá ku un Fokker 70 ku un kapasidat di 80 stul.
Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP) i Curacao Airport Holding (CAH) ta felisitá Jetair ku nan destinashon nobo i ta deseá nan tur kos bon.
![](https://www.curacaotouristboard.com/wp-content/uploads/2022/01/Inaugural-Jetair-L3-1024x763.jpeg)
![](https://www.curacaotouristboard.com/wp-content/uploads/2022/01/Inaugural-Jetair-L5-1024x749.jpeg)
![](https://www.curacaotouristboard.com/wp-content/uploads/2022/01/Inaugural-Jetair-L4-1024x619.jpeg)
![](https://www.curacaotouristboard.com/wp-content/uploads/2022/01/Inaugural-Jetair-L6-1024x682.jpeg)