WILLEMSTAD- 1 di mart 2022 – Resientemente Ofisina di Turismo di Kòrsou (CTB) a presentá su Plan di Akshon 2022 pa region di Nort Amérika, Europa, Sur Amérika i Karibe. Durante di e seshonnan, CTB a presentá su strategia pa 2022 den e diferente merkadonan di enfoke. Minister di Desaroyo Ekonómiko, Ruisandro Cijntje tambe tabata presente na un di e seshonnan.
A para ketu na e tendensianan aktual den mundu di biahe i tambe e akshonnan komersial kombiná ku e aktividatnan i táktikanan di relashon públiko ku lo bai keda ehekutá. A kompartí tambe e situashon aktual den e merkadonan di enfoke i e airlift disponibel for di e diferente merkadonan. Tambe esnan presente a risibí informashon referente e tipo di trepnan edukashonal i pa prensa ku lo keda implementá pa prensa internashonal, influencers i agentenan di biahe. Ademas a presentá tambe e aserkamentu digital planiá pa 2022. Mas aleu a duna informashon di e diferente oportunidatnan di promoshon ku por keda kordiná huntu pa asina hiba e promoshon di nos pais na e siguiente nivel.
