WILLEMSTAD- 5 di aprel 2022 – Jetair Caribbean a selebrá inisio di otro ruta mas, kual ta e konekshon entre Kòrsou i Sürnam. E buelo inougural aki ta marka inisio di e di seis destinashon di e aerolínea. Promé ku salida di e buelo rumbo pa Sürnam, Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP), Curacao Airport Holding (CAH) huntu ku e aerolínea a tene un resepshon na Aeropuerto Internashonal Hato pa selebrá e echo spesial aki. Durante di e selebrashon a hiba palabra, Minister Larmonie – Cecilia den representashon di Minister di Desaroyo Ekonómiko, Ruisandro Cijntje, Minister di Tráfiko, Transporte i Planifikashon Urbano, Charles Cooper, Managing Director di Jetair Caribbean Antonio Ribeiro, CEO di Jetair Caribbean Robert Maas i Director of Air Service Marketing & Development na Curaçao Airport Partners, Peggy Croes.
Na salida di e buelo rumbo pa Paramaribo, Sürnam e avion a risibí e tradishonal saludo di awa. E ruta nobo di Jetair ta hasi posibel pa mas turista for di Sürnam bin eksperensiá e produkto úniko ku Kòrsou ta ofresé. Ademas, e konekshon nobo ku Jetair a inisiá ta brinda tambe mas opshon di biahe pa nos pueblo lokal. E buelo di Jetair lo ta un biaha pa siman riba djamars. E buelonan ta keda efektuá ku un Fokker 70 ku un kapasidat di 80 stul.
Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP) i Curacao Airport Holding (CAH) ta felisitá Jetair ku nan destinashon nobo i ta deseá nan tur kos bon.
