Bishitá e dianan di informashon i registrá bo mes!
WILLEMSTAD- 30 di yüni 2022 – Resientemente, Gobièrnu di Kòrsou a pone fondonan disponibel pa start diferente training pa prepará personanan pa por yena vakaturanan den sektor di turismo i hospitalidat. Sektor di turismo ta kresiendo i mester di personanan bon prepará den diferente funshon pa por okupá e vakaturanan. Pa e motibu aki lo organisá 2 dia di registrashon pa tur ku ke djòin e tim di turismo. Lo bai ehekutá diferente trayekto di training kòrtiku i mediano pa medio di e konsepto di werkend-leren (traha i siña). E kursonan ku ta bai start próksimamente ta; kokí, weiter, bartènder i housekeeping. E kursonan aki lo keda ofresé di forma grátis. Tur ku ta interesá por pasa i inskribí nan mes dia 4 òf 5 di yüli próksimo na Sambil Curaçao entre 8:30 mainta pa 3’or di atardi.
E programa di training ta resortá bou di Ministerio di Desaroyo Ekonómiko (MEO) miéntras Ofisina di Turismo di Kòrsou (CTB) ta enkargá ku ehekushon di e programa. E programa lo keda ehekutá den estrecho kolaborashon ku Ministerio di Desaroyo Sosial, Labor i Bienestar (SOAW), Ministerio di Enseñansa (OWCS) i partnernan den sektor privá.
