di sinku pa 7 buelo pa siman
WILLEMSTAD – 24 di yanüari 2023 – Ofisina di Turismo di Kòrsou (CTB) ta anunsiá ku entrante promé siman di aprel, COPA Airlines ta introdusí 1 buelo èkstra pa un total di 6 buelo direkto pa siman for di Panama i entrante promé siman di mei COPA Airlines lo introdusí buelonan diario pa nos pais. E buelonan adishonal ta bini komo resultado di un demanda kresiente for di e merkado latino amerikano spesialmente Brazil, Colombia i paisnan den sur di Latino Amérika esta Argentina, Chile i Uruguay. Tambe mester menshoná e bon kolaborashon ku tin entre COPA Airlines i stakeholders lokal manera Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA).
Ku e oumento den kantidat di buelo, rutanan ida i buèlta lo bai ta disponibel 6 biaha pa siman entrante 5 di aprel i entrante 4 di mei riba djaweps tambe pa un total di 7 buelo pa siman. Pues entrante luna di mei Kòrsou lo bai tin un oumento di 30% den kapasidat di stul pa siman for di Panama. Panama ta un hùb importante pa konektá ku Latino Amérika i ta sòru pa mas konekshon ku Estádos Unídos. Di akuerdo ku Minister di Desaroyo Ekonómiko, sr. Ruisandro Cijntje, “esaki ta otro logro grandi pa nos industria di turismo. E oumento den kantidat di buelo di COPA Airlines ta brinda e oportunidat pa Kòrsou sigui krese e merkado latino amerikano. Na mes momentu e oumento aki ta kontribuí na diversifikashon di nos merkadonan di enfoke”.
CTB ta ansioso pa risibí mas bishitante for di e merkado latino amerikano i pa kompartí e bunitesa di nos pais.
