WILLEMSTAD – 16 di febrüari 2023 – Ofisina di Turismo di Kòrsou (CTB) ta raportá ku Kòrsou a risibí un total di 48.042 turista di estadia durante luna di yanüari. Di e 48.042 turistanan, 47% ta prosedente di Europa, 32% for di Nort Amérika, 13% for di Sur Amérika miéntras un total di 5% a bishitá nos for di Karibe. Total Kòrsou a risibí un averahe di 1.550 turista di estadia pa dia ku a keda un total di 488.808 anochi riba Kòrsou. Un total di 37% di e turistanan ku a biaha pa Kòrsou ta personanan entre e edat di 45 – 64 i 34% ta entre 25 – 44.
For di Hulanda un kantidat di 19.812 turista a keda risibí durante e promé luna di aña, esaki ta 16% ménos kompará ku aña pasá. Un kantidat di 781 turista di estadia a keda risibí for di Alemania i 519 for di Bèlgika. Kòrsou a risibí un total di 22.818 turista for di Europa, esaki ta 13% ménos kompará ku aña pasá. Di e kantidat di bishitante risibí for di Europa, 52% a keda den un ‘resort hotel’ (esta hotèl grandi, chikí i bùngalo).
CTB a antisipá e prestashon ménos positivo aki for di region di Europa pa motibu di ménos kapasidat di stul di avion kompará ku aña pasá. E esfuersonan kontinuo durante añanan anterior promoviendo nos pais tambe den otro merkadonan di enfoke ta surgiendo efekto. Awor por mira kon e prestashon di otro merkadonan a yuda kubri e prestashon ménos positivo for di Europa. Esaki ta demostrá un biaha mas e importansia di diversifikashon den turismo di estadia pa nos pais.
For di e region di Nort Amérika un kantidat di 15.369 turista a bishitá Kòrsou registrando un kresementu di 263%. For di Estádos Unídos nos a registrá un kantidat rèkòrt di turista di estadia. Total 11.063 a keda risibí na yanüari. For di Canada nos a risibí 4.306 turista di estadia, e kantidat aki tambe ta pa promé biaha. Un total di 72% di e turistanan prosedente di Nort Amérika a keda den resort hotels. For di region di Sur Amérika un total di 6.341 turista di estadia a bishitá Kòrsou. Di e turistanan for di Sur Amérika, 2.505 esta 40% tabata prosedente di Colombia. Miéntras, 1.351 (21%) tabata prosedente di Brazil. Un mayoria di 60% di turista di estadia prosedente di Sur Amérika a keda den un resort hotel na luna di yanüari. For di region Karibe un total di 2.443 turista di estadia a keda risibí na yanüari. Mayoria di e turistanan aki ta prosedente di e paisnan di Karibe Hulandes.
Na luna di yanüari un total di 42 barku krusero a bishitá nos pais ku un total di 107.699 turista krusero. Na yanüari 2022, Curaçao Ports Authority (CPA) a raportá 42 barku krusero ku un total di 40.056 turista krusero.
Aña pasá tabata un aña espektakular pa industria di turismo i e ophetivo ta pa mantené e forsa di kresementu aki durante henter e aña aki. CTB su ophetivo pa 2023 ta pa mantené e kantidat di turista di estadia for di Europa igual i pa gradualmente krese e kantidat di turista for di Nort Amérika, Sur Amérika i Karibe. E strategia aki lo mester hiba nos na 7% mas turista di estadia den 2023, yegando na un total di 525 mil turista di estadia. Adishonalmente, CTB su meta ta pa atraé turistanan ku ta gasta mas durante nan estadia riba nos pais kompará ku e turistanan ku tabata bishitá nos den pasado.
