ku partisipashon di 1099mucha
WILLEMSTAD – 11 di yüli 2023 – Manera ta konosí aña pasá riba Dia Mundial di Turismo, Ofisina di Turismo di Kòrsou (CTB) den estrecho kolaborashon ku Ministerio di Enseñansa i Ministerio di Desaroyo Ekonómiko a lansa turismo komo materia pa skol di fundeshi grupo 5 i skol spesial. Meta di introdukshon di turismo komo materia na skol di fundeshi ta pa yuda amplia nos muchanan su konosementu riba e importansia di turismo pa nos pais i na mes momentu lanta e interes pa e sektor importante aki. Durante aña eskolar 2022/2023 e muchanan a sera konosí ku diferente tópiko relashoná ku turismo via videonan i un buki di tarea i awor na final di e aña eskolar, CTB a ehekutá e proyekto Kids Tourism Experience. E proyekto a tuma lugá di 19 di yüni pa 5 di yüli 2023 dunando e muchanan di grupo 5 e oportunidat pa eksperensiá e sektor di turismo di aserka.
Komo parti di e proyekto Kids Tourism Experience, e muchanan a partisipá na diferente tour edukativo, sera konosí ku nos Mega Pier pa eksperensiá e sitio kaminda nos turistanan krusero ta drenta nos pais, nos aeropuerto pa mira kon e turista di estadia ta drenta nos pais, kore den trolley, bishitá diferente atrakshon turístiko i hotèlnan. Un total di 1099 mucha di 28 skol a partisipá na e proyekto Kids Tourism Experience. Pa ehekushon di e proyekto, CTB a partner ku 23 kompania di sektor di turismo ku a habri nan portanan di manera boluntario pa e muchanan bin eksperensiá nan produkto i servisio. E muchanan a hasi hopi pregunta ku sigur lo yuda nan komprondé mas mihó loke nan a siña durante e lèsnan di e materia di turismo. E kompanianan partisipante a ofresé e muchanan un eksperensia inolvidabel. E gastunan di transporte pa bishitá e diferente sitionan a keda kubrí pa CTB. CTB ta gradisí tur e partnernan di sektor di turismo ku a forma parti di e proyekto aki: Children’s Museum, Amazonia, Curaçao Sea Aquarium, Harbor Hotel & Casino Curaçao, Splashy Iguana Tours, Hofi Mango, Ostrich Farm, Avila Beach Hotel, Renaissance Wind Creek Curaçao Resort, Aloe Vera Farm, Curaçao Activities / TMC, Landhuis Chobolobo, Curaçao International Airport, Landhuis Bloemhof, Carmabi, Kunuku Aqua Resort, Atlantis Adventures, Maritime Museum, Museum Yubi Kirindongo, Curaçao Ports Authority, Serena’s Art Factory, Barco Santa Maria i Gròt di Hato.
