WILLEMSTAD- 27 di ougùstùs 2023 – Parasasa Hotel Curaçao ta un hotèl di aprendisahe (leerhotel) ku aktualmente ta ser renobá ku un kapasidat di 43 kamber pa huéspetnan. E hotèl ta ofresé servisio mayormente pa medio di empleadonan i tambe studiantenan. E hotèl di aprendisahe ku lo habri pronto ta ofresé e oportunidat pa studiantenan por kuminsá haña e sabor di e kombinashon di siña i eksperensiá, den un ambiente di aprendisahe yamá Experience Center (Sentro di Eksperensia).
E empleadonan di e hotèl kende ta enkargá ku operashonnan diario por supervisá i guia e studiantenan ku ta kore stazje, miéntras nan ta sirbi komo nan leermeester (tutor). E stazjèrnan ta haña eksperensia práktiko den e hotèl di aprendisahe manera den kualke otro hotèl. Tin tambe maestronan ku ta brinda entrenamentu práktiko na e studiantenan di Hotèl i Turismo di Maris Stella i Nilda Pinto, den e ambiente di siñamentu kombiná ku eksperensia na e hotèl di aprendisahe. Pa medio di e kooperashon di ROC Mondriaan ku e skolnan na Kòrsou, edukashon di e studiantenan ta ser reforsá mutuamente.
Studiantenan di SBO ta risibí instrukshon for di e maestronan, i bou di guia di e maestronan akí, nan ta kumpli ku tareanan pa duna servisio na huéspetnan real den e hotèl di aprendisahe. E studiantenan di turismo ta siña tambe pafó di e hotèl di aprendisahe, direktamente den e indústria di turismo. E estudionan akí di turismo ta kumpli ku e demanda aktual di e sektor di hospitalidat i turismo pasobra nan ta usa konosementu i eksperensia di e komunidat empresarial. E konsepto nobo akí ta hasi e hotèl di aprendisahe un ambiente di aprendisahe úniko i asina por satisfasé Kòrsou su nesesidat pa mas i mihó personal ku ta bon entrená i kapasitá pa traha den Hospitalidat i Turismo.
Pa studiantenan di e skolnan di Kòrsou esaki ta nifiká ku nan por haña un edukashon balioso riba nos mes isla, i ku perspektiva ekselente pa futuro. Nan por sigui for di SBO pa UoC, kaminda di un forma aselerá nan por sigui un estudio riba nivel di HBO/universitario den nan ramo, òf nan por bai traha i kuminsá nan karera prometedor den Hospitalidat i Turismo. UoC tambe ta enbolbí i lo usa e hotèl di aprendisahe pa enseñansa i stazje.
E hotèl di aprendisahe ta ser operá i tambe di hür pa Fundashon CHTTC. E direktiva di e fundashon ta konsistí di CHATA, CTB i ROC Mondriaan. E skolnan ta responsabel pa e aspekto di enseñansa di e hotèl di aprendisahe.
