un evento di 3 dia pa interkambiá ku miembronan di prensa, agensianan di biahe i konsumidónan
WILLEMSTAD- 31 di ougùstùs 2023 – Ofisina di Turismo di Kòrsou (CTB), den kolaborashon ku partnernan di e sektor di hospitalidat, resientemente a inisiá un evento transformativo di 3 dia na Sürnam. Curaçao Fest 2023 a enfoká riba fomentá relashonnan i kolaborashonnan mas fuerte na Sürnam, miéntras a stimulá e deseo di konsumidónan pa eksperensiá e enkanto vibrante di Kòrsou durante nan vakansi benidero den luna di sèptèmber. E evento a duna un bista di nos akomodashonnan i a ofresé esnan presente un sabor di e kultura riku i e bunitesa di Kòrsou. Curaçao Fest 2023 a risibí bishitantenan di 20 medio di komunikashon, mas ku 30 agente di biahe, i mas ku 700 persona kende a asistí n’e evento akí.
E promé dia di Curaçao Fest a ser dediká na interkambiá ku miembronan di prensa, kuminsando ku un desayuno típiko di Kòrsou ku a habri kaminda pa un dia informativo. Esnan presente a haña presentashonnan tokante nos hotèlnan lokal, siguí pa un resúmen interesante di Regional Manager di Karibe, sra. Elaine Hart-Francisca kende a kompartí e último aktividatnan, eventonan benidero i desaroyonan na Kòrsou, dunando asina miembronan di prensa un bista amplio di e paisahe dinámiko di nos isla. Un tayer di arte interaktivo dirigí pa nos artista lokal Avantia Damberg a agregá un toke kreativo, permitiendo miembronan di prensa pa traha nan propio arte riba tasnan inspirá pa imágennan ikóniko di Kòrsou. E evento a konta ku presensia di medionan di komunikashon influensial na Sürnam.
E di dos dia a enfoká riba ekipá agentenan di biahe ku e hèrmèntnan ku nan tin mester pa promové i bende Kòrsou efektivamente. E agentenan di biahe a haña presentashonnan detayá serka sra. Hart-Francisca i serka e hotèlnan ku ta partner di CTB, esta Courtyard by Marriott Curaçao, Harbor Hotel & Casino Curaçao i Brion City Hotel. Asina e agentenan a ser kapasitá i empoderá pa por mustra e ofertanan úniko di alohamentu ku Kòrsou ta brinda na biaheronan potensial.
E evento a kulminá ku un show vibrante pa konsumidó na e International Mall Suriname nobo. Mas ku 20 stènt di diferente partner, inkluyendo aerolíneanan, agensianan di biahe i hotèlnan, a dekorá e lugá, inspirando bishitantenan pa imaginá i visualisá nan próksimo vakansi na Kòrsou. Esnan presente por a deleitá nan mes ku e delisianan kulinario di Kòrsou i disfrutá di un bon pan ku stobá presentá den un trùk’i pan. Bishitantenan tabatin e oportunidat pa partisipá na un tayer di arte guiá pa Avantia Damberg i tambe eksperensiá e kultura di Kòrsou pa medio di un tayer di baile di Tambú. E dékòr den fondo, ku tabata mustra e imágen ikóniko di ‘Handelskade’ di Kòrsou, a hiba e bishitantenan na kurason di nos isla.
CTB ta ekstendé gratitut na su partnernan di hotèl, inkluyendo Courtyard by Marriott Curaçao, Harbor Hotel & Casino Curaçao i Brion City Hotel, i e artista lokal Avantia Damberg, pa nan kontribushonnan balioso na e éksito di Curaçao Fest 2023.
