E frekuensia di buelo lo oumentá na dos biaha pa siman entre desèmber i aprel
WILLEMSTAD- 14 di sèptèmber 2023 – Ofisina di Turismo di Kòrsou (CTB) ta anunsiá ku entrante fin di òktober próksimo te ku mei 2024 e aerolínea WestJet lo ehekutá su skema di wenter pa Kòrsou. WestJet ta e di dos aerolínea di mas grandi di Canada ku pa basta aña ta operando buelonan direkto semanal pa Kòrsou durante temporada di wenter.
E skema di wenter di WestJet ta inisiá 29 di òktober 2023 ku 1 buelo pa siman entre Toronto i Kòrsou riba djadumingu. Entrante 18 di desèmber te ku 1 di aprel 2024 e buelonan entre Toronto i Kòrsou lo oumentá na 2 biaha pa siman riba djadumingu i djaluna. E desishon aki ta bini komo resultado di e demanda haltu pa Kòrsou. For di 7 di aprel te ku 5 di mei 2024 e aerolínea lo ehekutá su buelo regular ku frekuensia di 1 biaha pa siman riba djadumingu. E skema di wenter aki ta nifiká ku mas turista for di Canada por bishitá Kòrsou pa nan vakashon. Na mes momentu e oumento den kantidat di buelo ta brinda mas opshon di biahe pa nos pueblo lokal ku ke bishitá Toronto. E buelo pa Kòrsou lo keda efektuá ku un Boeing 737 MAX ku un kapasidat di 174 stul.
Turismo di Kòrsou ta sigui riba bon kaminda. E esfuersonan pa Kòrsou ta mas aksesibel pa turistanan for di Canada, ta un kolaborashon estrecho entre WestJet i partnernan lokal; Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA).
