WILLEMSTAD – 16 di òktober 2023 – Ofisina di Turismo di Kòrsou ta kontentu di por anunsiá un kresementu signifikante den kantidat di turista di estadia na luna di sèptèmber 2023. Un total di 45.952 turista di estadia a keda registrá. E kresementu total den turista di estadia na sèptèmber ta un kantidat remarkabel di 23%, surpasando tur ekspektativa mirando ku normalmente sèptèmber ta keda konsiderá komo un luna slo pa turismo riba nos isla. E logro aki ta enfatisá e atrakshon pa Kòrsou durante henter aña i e abilidat pa atraé turistanan for di vários parti di mundu. Aña pasá sèptèmber un total di 37.230 turista di estadia a keda risibí.
E estadístikanan te na e momentunan aki ta ilustrá un prestashon impreshonante pa industria di turismo di Kòrsou, ku un total akumulativo di 419.020 turista di estadia na 2023. E kantidat aki ta representá un kresementu supstansial di 18% kompará ku 355.662 turista di estadia ku a bishitá Kòrsou durante e mesun periodo na 2022. E imágen abou ta mustra e prestashon mensual di 2023 kompará ku e meta mensual i e kantidat di turista risibí na aña pasá.
Resultadonan notabel turista di estadia sèptèmber 2023:
Turistanan brasilero: Pa promé biaha den un solo luna, e kantidat di turista registrá for di Brazil a surpasá 3.000 demostrando e popularidat kresiente di Kòrsou bou di turistanan sur amerikano. Un total di 3.079 turista brasilero a keda risibí na luna di sèptèmber esaki ta 200% kresementu kompará ku sèptèmber 2022. E konekshon direkto semanal for di Belo Horizonte ku Azul Airlines i e otro opshonnan di konekshon via Panama òf Bogotá, den kombinashon ku e esfuersonan kontinuo di merkadeo di Kòrsou na Brazil ta dunando fruta. Debí na e demanda haltu den turista for di Brazil, Azul a anunsiá ku nan lo oumentá nan kapasidat na dos biaha pa siman entrante òktober. CTB ta antisipá ku e merkado aki lo sera aña ku kantidat espektakular di turista di estadia. Total e aña aki te ku sèptèmber un kantidat di 17.477 turista a keda registrá, esaki ta un kresementu di 137% kompará ku e mesun periodo na aña pasá.
Turistanan merikano: E merkado di Estádos Unídos a sigui mustra un kantidat stabil di turista di estadia registrando un total di 10.497 turista na sèptèmber, 31% kresementu kompará ku sèptèmber 2022. Kòrsou a risibí un kantidat remarkabel di 104.772 turista den e promé 9 lunanan di 2023. Ta promé biaha den historia ku Kòrsou a risibí riba 100 mil turista merikano den un solo aña. Faltando 3 luna mas di e aña aki i ku e oumento den kapasidat di stul den e último luna di aña, CTB ta antisipá ku e merkado aki tambe lo kontribuí na un aña di turismo espektakular ku lo kibra tur rèkòrt.
Turistanan for di Hulanda i Europa: Nos merkado primario a eksperensiá un bahada leve registrando 4% ménos turista di estadia, ku un total di 15.333 turista hulandes na sèptèmber 2023. Aña pasá un total di 15.963 turista hulandes a keda risibí na luna di sèptèmber. E prestashon di region di Europa a konosé un bahada di 4%. E imágen abou ta mustra e prestashon di kada region kompará ku aña pasá, inkluyendo e kantidat ku kada region ta representá den e total di turista di estadia ku a bishitá nos pais.
Tòp 5 paisnan
Huntu e paisnan den tòp 5 na luna di sèptèmber 2023 a representá un total di 73% den kantidat di turista di estadia. Estádos Unídos, Colombia, Brazil i Canada a registrá kresementu fuerte na sèptèmber di respektivamente, 31%, 53%, 200% i 331%. E merkado hulandes a kai kòrtiku registrando 4% ménos turista na sèptèmber 2023. E imágen abou ta ilustrá e prestashon di e tòp 5 paisnan inkluyendo e tòp 3 estadonan for di kua nos turistanan ta prosedente.
Tipo di akomodashon, promedio di anochi i demografia
Informashon kompilá for di e karchinan di imigrashon ta mustra ku total turistanan a pasa un promedio di 8.3 anochi na Kòrsou durante luna di sèptèmber. Turistanan hulandes a pasa un promedio di 11.7 anochi na luna di sèptèmber, similar na aña pasá sèptèmber 2022 E bishitantenan for di Estádos Unídos i Brazil a pasa un promedio di 6.1 i 7 anochi respektivamente na sèptèmber. Di tur e turistanan, 57% a keda den un resort hotel. Hopi di e turistanan ku a biaha pa Kòrsou na sèptèmber ta entre 25 – 44 aña (45%) miéntras 33% ta entre 45 – 64 aña. E imágennan abou ta ilustrá e akomodashon i demografia di e turistanan ku a biaha pa Kòrsou na sèptèmber 2023.
