3 buelo semanal
WILLEMSTAD- 18 di desèmber 2023 – Den un ambiente ameno na CUR airport, a tuma lugá selebrashon di e buelo direkto nobo di Surinam Airways konektando Miami i Kòrsou. E skema ta inkluí 3 buelo semanal riba djaluna, djárason i djabièrnè. E buelonan lo keda efektuá ku un Boeing 737-800 ku un kapasidat di 150 stul. Na yegada di e promé buelo na nos aeropuerto e avion a keda risibí ku e tradishonal saludo di awa.
Durante e seremonia a hiba palabra, Minister di Desaroyo Ekonómiko, sr. Ruisandro Cijntje, Minister di Tráfiko, Transporte i Planifikashon Urbano, sr. Charles Cooper, sr. Gonesh Steven, CEO di Surinam Airways i sr. Jonny Andersen, CEO di CAP. Mas aleu, Minister Cijntje, Minister Cooper i sr. Muryad de Bruin (CTB), huntu ku sra. Christa Zuiverloon, Kònsùl General di Sürnam i sr. Andersen (CAP) a hasi entrega di un plakat konmemorativo na Surinam Airways, ilustrando nos bunita Handelskade i nos famoso Koningin Emmabrug konosí komo ‘Swinging Old Lady’.
Kòrsou ya tin un relashon di basta aña ku Surinam Airways, e aerolínea ta ehekutando buelonan direkto for di Paramaribo pa Kòrsou. E aerolínea awor a amplia su skema di buelo, introdusiendo buelonan direkto for di Miami pa Kòrsou. E konekshon nobo di Surinam Airways ta habri posibilidat pa mas turista for di Miami i otro siudatnan na Merka bin eksperensiá tur loke Kòrsou tin di ofresé i mas ku tur kos e kaluroso hospitalidat di nos hendenan. Introdukshon di e buelo direkto di Surinam Airways no solamente ta alsa e opshonnan di biahe pa nos bishitantenan for di eksterior pero na mes momentu e ta brinda tambe mas opshon di biahe pa nos pueblo lokal.
Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA) ta felisitá Surinam Airways ku nan ruta nobo, Miami – Kòrsou!
