komo parti di e programa di Training pa Industria di Hospitalidat
WILLEMSTAD – 25 di mei 2024 – Resientemente un total di 18 kursista a risibí nan sertifikado di Guia Turístiko Multifunshonal komo parti di e programa di training Her & Bijscholingstraject Hospitality Sector. E kursistanan a sigui un kurso kòrtiku intensivo (crash course) den kua nan a haña konosementu básiko teorétiko i tambe práktika pa por drenta e industria di hospitalidat. Durante un seremonia ameno, e kursistanan a risibí nan sertifikado serka Sector Directeur Desaroyo Ekonómiko i Inovashon, sra. Zulaika Mook, den representashon di Minister Ruisandro Cijntje, kompañá pa representantenan di Fundashon Museo Tula, sr. Shurbey Alberto, Presidente i sra. Drs. Jeanne Henriquez ku a desaroyá e kurso. E personanan ku a terminá e kurso ta trahando awor na diferente museo i atrakshon turístiko den área di Bándabou.
E kurso di Guia Turístiko Multifunshonal a enserá 3 luna di entrenamentu intensivo di teoria i abilidatnan práktiko pa bira un guia turístiko sertifiká. E kurso a enserá 6 módulo; Nos Historia i Kultura, Industria Turístiko, Servisio na Kliente, Herensia Kulinario, Práktika di un Storyteller, Guia/Kaminata den Naturalesa i e módulo Liderazgo Históriko i Kultura. E kursistanan tur tabata personanan interesá pa traha den área di Bándabou i motivá pa drenta e industria kresiente di hospitalidat i turismo. E kursistanan a kompletá tambe e Personal Empowerment training, dirigí riba desaroyo di nan abilidatnan interpersonal. Durante di e trayekto e grupo a risibí ademas un seshon di informashon di parti di CTB pa keda informá riba aspektonan relashoná ku merkadeo di nos pais den eksterior, sifranan di turismo di estadia i desaroyo di e produkto turístiko.
E programa di training ta resortá bou di Ministerio di Desaroyo Ekonómiko (MEO) i Ofisina di Turismo di Kòrsou (CTB) ta responsabel pa e implementashon. E programa ta keda ehekutá den estrecho kolaborashon ku Ministerio di Labor (SOAW), Ministerio di Enseñansa (OWCS) i partnernan den sektor privá. Pa registrá pa e programa di training bai riba www.curacaotouristboard.com/education/
CTB, MEO, SOAW i OWCS ta felisitá e kursistanan i ta deseá nan tur klase di éksito den e industria di hospitalidat.
