WILLEMSTAD – 13 di yüni 2024 – Ofisina di Turismo di Kòrsou (CTB) ta kontentu pa anunsiá otro kresementu signifikante den kantidat di turista di estadia. Nos pais a registrá un kresementu remarkabel di 24% den kantidat di bishitante kompará ku mei aña pasá, yegando na un total di 53.970 turista di estadia. E logro aki ta reforsá Kòrsou su posishon komo e destinashon di biahe lider den Karibe.
Kòrsou ta sigui atraé un base di bishitante diverso, ku Europa na promé lugá ku 41% di e merkado na luna di mei. Nort Amérika ta sigui su tras, kontribuyendo ku 29%, reflehando e atrakshon di nos isla pa bishitantenan di Estádos Unídos i Canada, Sur Amérika ta representá 20% di tur bishitante risibí, miéntras e region di Karibe ta kontribuí ku 7%.
Prestashon tòp 3 merkadonan pa Kòrsou na mei
Hulanda, Kòrsou su merkado primario a registrá un total di 19.157 turista di estadia hulandes demostrando un kresementu notabel di 20% kresementu na mei. Un total di 22% di e bishitantenan hulandes ta prosedente di Zuid-Holland, 16% di Noord-Holland i 10% ta residentenan di Noord-Brabant. Adishonalmente e distribushon di edat di bishitantenan hulandes ta reflehá un variedat diverso, 33%, ta kai den e grupo di edat entre 45 – 64 aña, miéntras e grupo di edat di 25 – 44 aña tabata 32%. Pa loke ta trata preferensia di akomodashon, mayoria bishitante hulandes a opta pa otro opshon di akomodashon (56%), miéntras e 44% restante a skohe pa keda na un resort hotel. Turistanan hulandes a keda un promedio di 10.5 anochi na luna di mei.
Un total di 14.276turistaa keda risibí for di Estádos Unídos, kual ta un kresementu fuerte di 26% kompará ku aña pasá. E merkado di Estádos Unídos ta sigurando su posishon komo un merkado importante pa Kòrsou. Di e bishitantenan di Estádos Unídos, 18% ta prosedente di New York, 8% di Florida, 5% di North Carolina miéntras New Jersey i Georgia kada un a kontribuí ku 4%. E distribushon di edat di bishitantenan for di Estádos Unídos ta primeramente esnan entre 45 – 64 aña (36%), siguí pa esnan entre 25 – 44 aña (33%). Pa loke ta trata preferensia di akomodashon, 68% a opta pa resort hotels, miéntras e 32% restante a skohe otro opshon di akomodashon disponibel riba nos isla. Turistanan merikano a keda un promedio di 6.2 anochi riba Kòrsou.
Brazil, e di 3 pais ku prestashon tòpa eksperensiá un kresementu remarkabel, ku un oumento impreshonante di 116% den kantidat di turista di estadia, yegando un total di 3.842 bishitante. Esaki ta nifiká un oumento supstansial kompará ku e 1.780 turista brasilero registrá na aña pasá. Turistanan prosedente di Brazil a keda un promedio di 6.9 anochi riba nos isla na luna di mei. Pa loke ta trata eskoho di akomodashon, 60% a opta pa keda na un resort hotel.
Puntonan ku a destaká na mei 2024
Estadia na resort: Total, 54% di turistanan di estadia a skohe pa e variedat di akomodashonnan ku ta keda ofresé pa resort hotels, inkluyendo resort grandi, chikí, all-inclusive i bùngalo resorts. Un total di 46% a opta pa keda na un otro alohamentu riba nos isla.
Sifranan demográfiko: E mayoria, 41% di bishitantenan, ta kai den e grupo di edat entre 25 – 44 aña, siguí serka pa e grupo di edat di 45 – 64 aña, ku a representá 33% di e total di turistanan risibí.
Promedio di anochi: Total turistanan di estadia a pasa 7.8 anochi riba Kòrsou na luna di mei, un bahada di 7% kompará ku aña pasá.
Kantidat total di anochinan di estadia: Apesar ku e promedio di anochinan ta ménos kompará ku aña pasá, CTB a registrá un oumento di 13% den kantidat di anochinan di estadia kompará ku aña pasá, dor ku mas tantu turista a keda risibí. E total di anochinan di estadia na mei ta 408.471.
Prestashon turismo krusero: Na luna di mei, Curaçao Ports Authority (CPA) a raportá un total di 10 barku krusero ku un total di 37.376 turista krusero. Un bahada di 8% kompará ku aña pasá
Resúmen di aña te ku awor durante 2024
E sinku promé lunanan di 2024 a kuminsá fuerte, ku un total di 296.650 turista di estadia, registrando 30% kresementu kompará ku e mesun periodo na aña pasá. Tur merkado di enfoke ta kontribuyendo na e kresementu aki i CTB ta pronostiká kresementu den kantidat di turista di estadia pa final di e aña aki, ku un potensial pa yega na un total di 700 mil turista di estadia. E strategia pa sigui mehorá e éksito turístiko ta pa medio di partnership stratégiko i enkurashá esfuersonan koloborativo entre sektor públiko i privá. Meta di esaki ta pa mehorá aksesibilidat i posishoná Kòrsou komo e úniko destinashon den Karibe ku bo mester bishitá pa sintié pa bo mes….. Feel it for yourself.
