WILLEMSTAD- 26 di yüni 2024 – Resientemente Ofisina di Turismo di Kòrsou (CTB) a presentá na partnernan di sektor privá un resúmen di e akshonnan ehekutá durante e promé mitar di aña 2024 i e plannan pa sobrá di 2024 dirigí riba region di Nort Amérika, Europa, Sur Amérika i Karibe. E presentashon a inkluí partisipashon di representantenan di hotèl, resòrt, apartamentu, operadornan di tour i atrakshonnan turístiko.
Durante di e presentashon, a duna informashon riba e kampaña renobá di ‘Feel It For Yourself’, kual tin komo meta pa oumentá e interes pa bishitá Kòrsou ku avisonan vibrante i kolorido huntu ku un video promoshonal nobo ku ta duna un bista di tur loke ta hasi nos destinashon esun di mas outéntiko i esun ku bo mester bishitá. Tambe a kompartí e akshonnan di merkadeo ku a tuma lugá durante e promé mitar di aña, nan resultadonan i e akshonnan planiá pa e sobrá 6 lunanan di aña. CTB a elaborá tambe riba e kresementu di turismo di estadia for di tur nos merkadonan di enfoke i e porsentahe di kresementu ku por spera pa sobrá di aña teniendo kuenta ku e kantidat di buelonan aktual pa Kòrsou, oumento den skema di buelo di diferente aerolínea i tambe kantidat di stul adishonal dor di buelonan inougural programá pa Kòrsou. Adishonalmente a kompartí feedback risibí di turistanan tokante entre otro e áreanan general na Kòrsou ku mas turistanan gusta bishitá, respektivamente #1 Sentro di Siudat, Punda i #2 brùg di Ponton. Tambe a kompartí e evaluashon di turistanan pa loke ta trata e nivel di satisfakshon riba amabilidat di nos hendenan; aproksimadamente 93% di turistanan a skor e servisio ofresé pa empleadonan den e industria di turismo i públiko general komo ekselente i hopi bon.
Mas aleu, a spesifiká e strategianan pa atraé mas bishitante for di tur region entre otro, partisipashon na ferianan, workshop edukashonal pa agentenan di biahe, promoshon di eventonan, mishon komersial i promové inisiativanan konhunto. Tambe a kompartí e perfil di turistanan ku nos ta risibí for di kada region. Pa finalisá, a duna un bista di tur e aktividatnan ku a keda ehekutá durante e promé mitar di aña i esnan planiá pa sobrá di 2024 tantu riba tereno di desaroyo di produkto komo maneho.
E delaster kuartal di aña, CTB lo kompartí ku sektor privá e resultadonan di e promé 9 lunanan i lo duna un bista di e plannan inisial pa 2025.
