WILLEMSTAD- 30 di yüni 2024 – Resientemente a tuma lugá 2 pre konferensia mas komo preparashon pa e Kumbre Nashonal di Turismo ku Ofisina di Turismo di Kòrsou (CTB) huntu ku Ministerio di Desaroyo Ekonómiko (MEO) ta bai organisá riba Dia Mundial di Turismo, 27 di sèptèmber próksimo. E biaha aki a trata e tópiko Diversidat i su siguiente dia Outentisidat. Minister di Desaroyo Ekonómiko, sr. Ruisandro Cijntje i tambe Counterpart Director di CTB, sr. Muryad de Bruin a dirigí nan mes na e partisipantenan.
E pre konferensia ku tópiko Diversidat a konta ku partisipashon di 67 persona ku tin direktamente i indirektamente di aber ku industria di turismo. E seshon a enfoká riba kon por atendé mihó e nesesidatnan i preferensianan di turistanan ku ta bishitá nos pais ora ta trata entre otro eskoho di akomodashon, atrakshonnan i servisionan. Tambe a eksplorá strategianan kon pa involukrá diferente grupo den turismo i krea un balansa den e diversidat ku eksperensianan outéntiko.
Mas aleu, e seshon dirigí riba Outentisidat a trata e retonan ku por presentá ora ta trata mantenshon di e identidat kultural, natural i históriko di nos destinashon tambe durante kresementu den turismo. Durante di e seshon e partisipantenan a keda repartí den diferente grupo kaminda kada grupo a eksplorá e tópiko i huntu a para ketu na strategianan pa definí kresementu sostenibel ku ta respetá i preservá outentisidat. Un total di 70 persona a partisipá na e seshon aki.
Den luna di ougùstùs lo tuma lugá e último 2 seshonnan komo preparashon pa e kumbre. E tópikonan ku lo keda tratá ta: Partisipashon di komunidat i Kompetitividat. For di e seshonnan di pre konferensia lo sali pre resolushonnan ku lo keda diskutí den e kumbre na sèptèmber próksimo pa huntu yega na resolushonnan final. E resolushonnan final lo keda tradusí den akshonnan konkreto na benefisio di komunidat di Kòrsou i Kòrsou komo destinashon turístiko.
