Durante ‘vakantiejob’
WILLEMSTAD – 6 di ougùstùs 2024 – Resientemente un total di 22 studiante a risibí nan sertifikado di partisipashon na e promé edishon di Youth Tourism Experience (YTE) Program organisá pa Ofisina di Turismo di Kòrsou (CTB) den estrecho koperashon ku 12 kompania den industria di turismo. Meta di e programa YTE ta pa laga hóbennan entre 15 i 17 aña di edat familiarisá nan mes ku e industria kresiente di turismo i hospitalidat. Durante e promé edishon di YTE e hóbennan a haña e oportunidat pa eksperensiá kon ta pa traha den e industria di turismo i hospitalidat durante un ‘vakantiejob’ di 3 siman. E programa a keda klousurá ku un seremonia ameno kaminda Minister di Desaroyo Ekonómiko, sr. Ruisandro Cijntje i Counterpart Director di CTB, sr. Muryad de Bruin, a hasi entrega di sertifikado na e 22 hóbennan.
E programa di e promé edishon di YTE a kore di 26 di yüni pa 6 di ougùstùs i a konsistí di primeramente un ‘Meet & Greet’ tour kaminda e studiantenan a pasa sera konosí ku tur e kompanianan ku a forma parti di YTE. Di e manera aki e hóbennan por a hasi pregunta i siña mas di e tipo di trabou ku kada kompania ta ehersé. Ademas, e hóbennan a sigui 3 dia di workshop komo preparashon pa nan ‘vakantiejob’ den e industria di turismo i hospitalidat. Aki nan a trata e siguiente tópikonan: komunikashon i kon pa aktua di manera profeshonal, customer experience i dress code, money management, discipline i self management. Na final di e periodo di ‘vakantiejob’ e studiantenan a partisipá na un seshon di evaluashon kaminda nan por a papia di nan eksperensia, kiko a bai bon, ménos bon i kon nan ta bai sigui apliká e konosementu atkerí durante nan futuro karera eskolar i despues den trabou.
E kompanianan ku a partisipá na e promé edishon di YTE ta: Avila Beach Hotel, San Marco Hotel, Dolphin Academy, Serena’s Art Factory, Brion City Hotel, Curaçao Ports Authority, TUI, Atlantis/FBTT, Fiesta Tours, Kunuku Aqua Resort, Coral Estate Luxury Resort, Curaçao Marriott Beach Resort i CTB mes. CTB ta gradisí kada kompania ku a habri nan porta pa asina huntu nos por logra pa mas hóben haña e interes pa sigui un estudio den ramo di turismo i hospitalidat pa despues eventualmente skohe pa un karera den e industria aki.
