WILLEMSTAD- 5 di novèmber 2024 – E promé buelo di TUI Fly for di Bruselas, Bèlgika a baha na Kòrsou i a risibí e tradishonal saludo di awa. Bèlgika ta e di 3 merkado den Europa for di kua Kòrsou ta risibí mas tantu turista. Ku e konekshon nobo aki awor mas biahero por bin eksperensiá e bunitesa i e produkto turístiko amplio ku Kòrsou ta ofresé. TUI lo ofresé 2 buelo pa siman riba djamars i djasabra for di Bruselas pa Kòrsou ku un Boeing 787 ‘Dreamliner’. Kòrsou ya tin un relashon di basta aña ku TUI, e aerolínea ta operando buelonan direkto for di Amsterdam pa Kòrsou i awor a amplia su skema di buelo, introdusiendo buelonan tambe for di Bruselas.
Pa selebrá yegada di e promé buelo a tene un seremonia ameno kaminda a hiba palabra, sr. Charles Cooper, Minister di Tráfiko, Transporte i Planifikashon Urbano i alabes Minister di Desaroyo Ekonómiko, sr. Antoin Klein Hofmeijer, Head TUI Dutch Caribbean i sr. Jonny Andersen, CEO di Curaçao Airport Partners. Mas aleu, Minister Cooper i sr. Muryad de Bruin, Ofisina di Turismo di Kòrsou (CTB) huntu ku sr. Andersen (CAP), a hasi entrega di un plakat konmemorativo na sra. Roosmarijn Quartier (TUI) i sr. Klein Hofmeijer (TUI), ilustrando nos brùg Koningin Juliana. E turistanan prosedente di Bruselas awor por bin eksperensiá nos variedat di atrakshonnan turístiko, disfrutá di eventonan kultural, purba nos kushina lokal i mas ku tur kos interkambiá ku nos hendenan amabel. Na mes momentu e introdukshon di e konekshon ku Bruselas ta brinda mas opshon di biahe pa nos pueblo lokal.
Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA) ta felisitá TUI ku nan ruta nobo, Bruselas – Kòrsou!
